ShQO-da atys qarýyn saqtaý erejesin buzǵan 200-den astam adam jaýapqa tartyldy
ShQO Polıtsııa departamenti baspasóz qyzmetiniń málimetine súıensek, ár aptanyń dúısenbi jáne beısenbi kúnderi arnaıy oqý ortalyqtarynda Ákimshilik polıtsııa basqarmasynyń azamattyq jáne qyzmettik qarý aınalymyn baqylaý tobynyń qyzmetkerleri halyq arasynda atys qarýyn tirkeý boıynsha túsindirý jumystaryn júrgizedi. Alaıda soǵan qaramastan jyl basynan beri qarýdy saqtaý erejelerin buzǵany úshin 201 adam ákimshilik jaýapkershilikke tartylǵan. Sondaı-aq qarýdy talapqa sáıkes tirkemegen 153 adam anyqtaldy.
«Osy rette, azamattarǵa qarýdy saqtaý jáne qaıta tirkeý erejelerin qatań saqtaý qajettigin eskertemiz. Qarýdy tek ruqsat etilgen maqsatta paıdalanýǵa, qarý men onyń patrondaryn zańmen belgilengen tártipte saqtaýǵa, ony paıdalanǵan kezde qaýipsizdik talaptaryn qaperde ustaý qajettigin umytpaý qajet», - delingen habarlamada.
Sondaı-aq eldi mekennen shyqqan kezde nemese turǵyn úıdi uzaq merzimge qaldyrǵan jaǵdaıda (issapar, demalys, oqý, emdelý jáne t.b.) qarý-jaraqty aýmaqtyq ishki ister organdaryna ýaqytsha saqtaýǵa tapsyrýǵa bolady.