ShQO-da atmosfera sapasyn jaqsartýǵa bes jylda 24 mlrd teńge jumsalady

NUR-SULTAN. QazAqparat – Shyǵys Qazaqstannyń ekologııalyq problemalaryn sheshýge baǵyttalǵan jol kartasynda 35 is-shara kózdelgen. Bul sharalar týraly Úkimet otyrysynda Ekologııa geologııa jáne tabıǵı resýrstar mınıstri Maǵzum Myrzaǵalıev pen Shyǵys Qazaqstan oblysynyń ákimi Danıal Ahmetov tolyǵyraq aıtyp berdi, dep habarlaıdy QazAqparat tilshisi.

Maǵzum Myrzaǵalıev ol sharalarda Rıdder metallýrgııa kombınatyn ekologııalyq taza tehnologııalarmen jabdyqtaý, Óskemen qalasynda ornalasqan JEO-daǵy zııandy gazdan tazartý qurylǵylaryn jańǵyrtý, qoldanystaǵy kárizdik tazartý keshenderin qaıta jańartý, radıoaktıvti lastanýdyń jergilikti oshaqtaryn anyqtaý jáne joıý, ruqsat etilmegen qoqys tastaıtyn jerlerdi joıý jumystary qarastyrylǵanyn jetkizdi.

Al Danıal Ahmetov óńirdegi ekologııalyq problemalardy keshendi túrde sheshýdiń jospary iske asyrylyp jatqanyn sóz etti.

Onyń aıtýynsha, ekologııany jaqsartýǵa baǵyttalǵan ınvestıtsııanyń jalpy somasy - 60 mlrd teńge.

«Atap aıtqanda, bes jyldyń ishinde atmosferany jaqsartýǵa 24 mlrd teńge ınvestıtsııa salynady. Onyń 22,1 mlrd teńgesi Rıdder metallýrgııalyq keshenindegi tseh qurylysyna beriledi. Bul – Rıdder qalasy boıynsha atmosferaǵa kúkirt dıoksıdin shyǵarýdyń 714 tonnaǵa nemese 20 paıyzǵa azaıtýǵa múmkindik beredi. Bul oraıda keıingi 7 jylda aýanyń lastaný deńgeıi oblys boıynsha 10 myń tonnaǵa, Óskemen qalasy boıynsha 7 myń tonnaǵa azaıǵanyn atap ótý qajet. Osy kezeń ishinde iri kásiporyndar tabıǵat qorǵaý is-sharalaryna 35,2 mlrd teńge ınvestıtsııa saldy», - dedi ol.

Óńir basshysy oblys ortalyǵynda Ekologııalyq-qoǵamdyq monıtorıng júıesi jumys isteıtinin, ekologııalyq aqparatty onlaın rejımde kedergisiz alý úshin jaǵdaı jasalǵanyn málim etti.

Sondaı-aq Shyǵys Qazaqstanda eldi mekenderdiń jasyl beldeýleri qurylýda. Ótken jyly 175 myń, al bıyl 30 myń kóshet egilgen.

Ormandardy qalpyna keltirý jáne kógaldandyrý jóninde 2025 jylǵa deıingi is-sharalar jospary ázirlengen.