ShQO-da aspan astyndaǵy mýzeı ashý josparlanýda
ÓSKEMEN. QazAqparat - Shyǵys Qazaqstanda qoǵamdyq sanany jańǵyrý baǵdarlamasyn iske asyrý boıynsha 37 mańyzdy joba anyqtaldy. Búgin jınalysta oblys ákimi Danıal Ahmetov ǵalymdardyń osy bastamasyn qoldady, dep habarlaıdy «QazAqparat» HAA tilshisi.
Oblys ákiminiń baspasóz qyzmeti habarlaǵandaı, ShQO sarapshylary ýnıversıtetter men basqarmalardan túsken 154 usynysqa taldaý jasady. Olar onyń ishinen tarıhı-mádenı, ólketaný, týrıstik, aqparattyq baǵyttaǵy 37 áleýetti jobany tańdap aldy.
Óńirlik rýhanı jańǵyrý baǵdarlamasyn júzege asyrý aıasynda Shyǵys Qazaqstanda «Úlken Altaı» mýzeıin ashý, mádenı mura nysandarynyń Qyzyl kitabyn shyǵarý jáne tabıǵı, tarıhı jáne basqa da eleń etkizetin jaıttar beınelengen atlas jasaý josparlanýda.
«Bul - jaqsy ıdeıa. Qyzyl kitapta óńirdegi mádenı mura nysandary týraly tolyqqandy ǵylymı aqparattar jınaqtalatyn bolady. Jáne ol týrıstik marshrýtqa tek biregeı oryndardy engizýge jol ashyp qana qoımaı, sondaı-aq ashyq aspan astynda erekshe mýzeı ashýǵa múmkindik beredi», - dedi D. Ahmetov.
