ShQO-da áskerılerge 2 kóppáterli úı berildi
ÓSKEMEN. QazAqparat - Jyl basynan beri Shyǵys Qazaqstan oblysynda 173,3 myń sharshy metr baspana qoldanysqa berilgen, dep habarlaıdy QazAqparat tilshisi.
Oblystyq qurylys, sáýlet jáne qala qurylysy basqarmasynyń málimeti boıynsha, jyldyń qańtar-maýsym aılarynda barlyq qarjylandyrý qorlarynan 173,3 myń sharshy metr turǵyn úı qoldanysqa berilgen. Bul byltyrǵy jylmen salystyrǵanda 17,3 paıyzǵa kóp.
Onyń ishinde, jalpy aýmaǵy 110,0 myń sharshy metrdi quraıtyn 14 kóppáterli úı jáne 1 jataqhana bar. Jańadan salynyp bitken jer úılerdiń jalpy aýdany - 62 myń sharshy metr.
«Jarma aýdanyndaǵy Baqyrshyq taý-ken óndirý kásiporny óz jumysshylaryna 1 jataqhana salyp berdi. Onyń aýdany - 1,3 myń sharshy metr. Sondaı-aq, Zyrıan qalasynda 1 jataqhana salynyp bitti. 632 páterlik 7 turǵyn úı, 216 páterlik 3 nesıelik úı jáne salyndy. Áskerılerge arnap salynǵan 2 turǵyn úı de qoldanysqa berildi. Nátıjesinde 120 áskerı otbasy baspanaǵa ıe boldy» - delingen basqarmanyń resmı aqparatynda.
