ShQO-da Ashyq ákimdik front keńsesi ashyldy
Adaldyq alańy jobasyn iske asyrý aıasynda memlekettik organdar jumysynyń jedeldigi men ashyqtyǵy arttyrý maqsatynda Besqaraǵaı aýdanynda Ashyq ákimdik front keńsesi qurylǵan. Keńse open space formatynda jumys isteıdi. Aýdan ákiminiń orynbasary Almagúl Álimbaevanyń aıtýynsha, mundaı jobalar azamattar men atqarýshy bılik ókilderi arasyndaǵy kópir ispettes.
«Biz barlyq jaǵdaıdy jasaýǵa tyrystyq, atap aıtqanda kelýshiler úshin yńǵaıly kútý aımaǵy men balalar oınaıtyn oryndy jabdyqtadyq, aqparattyq stendter ornattyq. Artyqshylyǵy sol, eger másele bir qurylymdyq bólimsheniń kómegimen sheshilmeıtin bolsa, onda dál sol bólmede kómek kórsete alatyn basqa bólimniń ókili ornalasqan. Osylaısha bólimderdiń ókilderi bir-birine sheksiz qońyraýlar shalyp, kabınetterge kirip-shyǵyp júrmesten, jedel jáne sapaly túrde áreket ete alady», - dedi Almagúl Álimbaeva.
Keńsede aýdan turǵyndary úshin turǵyn úı-kommýnaldyq sharýashylyq, sáýlet, jer qatynastary, aýyl sharýashylyǵy, áleýmettik sala jáne basqa da máseleler boıynsha keshendi kómek kórsetiledi.
«Sondaı-aq front-keńsede aýdan ákimi men onyń orynbasarlary azamattardy jeke qabyldaıdy. Biraq qazir koronavırýs ınfektsııasynyń taralý qaýpine baılanysty barlyq kezdesýler onlaın rejımge aýystyrylǵan. Jyl basynan beri barlyǵy 14 qabyldaý ótkizilip, 80 ótinish kelip tústi. Olar abattandyrý, sýmen jabdyqtaý, turǵyn úı, joldardy tazartý, jer qatynastary, bilim berý jáne jumyspen qamtý máselelerine qatysty boldy», - dedi aýdan ákiminiń orynbasary.