ShQO-da asa qaýipti 3 qylmyskerdiń túrmeden qashyp ketkeni jaıly aqparat — jalǵan

ÓSKEMEN. KAZINFORM — Shyǵys Qazaqstan oblysy Glýbokoe aýdanynda asa qaýipti 3 qylmyskerdiń bostandyqta júrgeni jaıly jalǵan aqparat tarap jatyr.

Áleýmettik jelide Beloýsovka kentiniń turǵyndaryna dalaǵa shyqpaı, beıtanys adamdarǵa esikti ashpaý qajettigi jaıly jazylǵan aqparat tarady. 

— Úsh qaýipti qylmysker túrmeden qashyp ketti. Sol úshin qazir kent ishin polıtsııa patrýldep jatyr. Barynsha abaı bolyńyzdar! — delingen onda.

Bunyń ras-ótirigin bilý úshin Kazinform tilshisi ShQO Polıtsııa departamentine habarlasyp kórdik.

— Áleýmettik jelide ýaqytsha ustaý ızolıatorynan tutqyndardyń qashyp ketkeni týraly aqparat shyndyqqa janaspaıdy. Polıtsııa azamattardy tek resmı jáne rastalǵan aqparat kózderine senýge shaqyrady. Eger telefonyńyzǵa kúdikti habarlamalar kelse 102 jedel arnasyna qońyraý shalyńyz, — dep jaýap berdi departamenttiń baspasóz hatshysy Gúlnur Túsipova.

Eske salsaq, osyǵan deıin Qyzylorda oblysynda shegirtke shabýyly týraly jalǵan aqparat taratqandar qatań jazalanatyndyǵy jaıly habarlaǵan edik.