ShQO-da aryq tazalaý jumystaryna áskerıler jumyldyryldy
ÓSKEMEN. KAZINFORM –Shyǵys Qazaqstan oblysynda sý tasqynynyń aldyn alý sharalary jalǵasyp jatyr.
ShQO tótenshe jaǵdaılar departamenti baspasóz qyzmetiniń málimetinshe, tańnan beri Rıdder qalasynda tasqyndy boldyrmaý maqsatynda aryqtardy qardan tazalaý jumystary júrgizilip jatyr.
«Tarbaǵataı aýdanyndaǵy 8 aýylda sý ótkizgish qurylǵylardy, aryqtardy qardan tazalaý jumystary qolǵa alyndy. Al, Glýbokoe aýdany Bobrovka aýylyndaǵy Bobrovochka ózeniniń kópiri qardan tazartyldy. Shemonaıha aýdany da jumystar úzdiksiz jalǵasýda», - delingen aqparatta.
Kúrshim, Altaı, Ulan aýdandarynda sý tasqyny qaýpi boıynsha jaǵdaı aýdan basshylarynyń baqylaýyna alyndy. Barlyq okrýg ákimderine janar-jaǵarmaıdy jetkilikti mólsherde daıyndaýǵa tapsyrma berilgen.
Sondaı-aq Altaı aýdanyna qarasty Zýbovsk aýylynda 68303 áskerı bóliminiń 25 sarbazy aryq tazalaý jumystaryna kómektesip jatyr.