ShQO-da ara satyp alýǵa nesıe beriledi
ÓSKEMEN. QazAqparat - Shyǵys Qazaqstanda aýyl bıznesin qoldaýǵa beriletin nesıelerge qujat qabyldaý bastaldy, dep habarlaıdy QazAqparat tilshisi.
Aýyl sharýashylyǵyn qoldaý nesıeleri «Eńbek» jáne «Nátıjeli jumyspen qamtý» baǵdarlamalary arqyly berilmek.
«Aýyl sharýashylyǵyn qarjylaı qoldaý qorynyń oblystyq fılıaly barlyq aýdandarda ótinim qabyldaýdy bastap ketti. Aýylda kásip ashqysy kelgenderge «Igilik» baǵdarlamasy arqyly iri qara nemese usaq mal, túıe men qus ta satyp alýyna bolady. Al «Birlik» baǵdarlamasy arqyly bal arasyna nesıe beremiz» - deıdi fılıal dırektory Arman Raýylbaev.
Onyń aıtýynsha, nesıe berer kezde ár salanyń ishki erekshelikteri eskerilip, árbir ótinim berýshimen jeke suhbat júrgizilmek. Qordyń mamandary aýdan-aýdandy aralap, elden ótinish qabyldaýǵa kirisip ketken.
Jalpy óńirdegi shaǵyn jáne orta bıznesti jappaı damytý maqsatyna bıyl 5 mlrd teńgeden astam qarajat bólý josparlanǵan. «Eńbek» baǵdarlamasy boıynsha «Igilik», «Kásipker», «Eginjaı» nesıe ónimderi berilse, etti mal sharýashylǵyn qoldaý maqsatynda «Sybaǵa» baǵdarlamasynyń nesıeleri usynylady. Óńirdegi sút óndirisin qoldaý úshin «Yrys» baǵdarlamasy qolǵa alynbaq.
Byltyr osy «Eńbek» baǵdarlamasynyń aıasynda aýyl sharýashylyǵyn qarjylaı qoldaý qory oblystaǵy shaýralarǵa 5,2 mlrd teńgeniń 1 706 nesıesin bergen bolatyn. Bul nesıelerge qol jetkizýdiń alǵashqy sharty - bıznes álippesin arnaıy kýrstan úırený.
Al Agrarlyq nesıe korporatsııasy aýyldy jerlerde agrarlyq salamen qatysy joq bıznes-jobalarǵa da nesıe bermek. Ótken jyly bul uıym «Eńbek» baǵdarlamasy boıynsha shyǵysqazaqstandyq nesıe seriktestikteri arqyly 853,8 mln teńgeniń 176 nesıesin úlestirgen.
Bıyl bul soma 1,3 mlrd teńgege kóbeıtilip otyr. Atalmysh qarajatqa 255 joba qarjylandyrylmaq. Onyń 54-i startap-jobalar bolsa, qalǵany bıznesti jańa bastaýshylarǵa baǵyttalady.
