ShQO-da aptanyń sońyna deıin kóshkin júrý qaýpi saqtalady
ShQO Tótenshe jaǵdaılar departamenti baspasóz qyzmetiniń málimetine súıensek, 13-19 sáýir aralyǵynda óńirdiń taýly aımaqtarynda kóshkin júrýi múmkin. Jyl saıyn kóktemniń alǵashqy aılarynda qar kóshkini qaýpi joǵary bolady.
«Qubylmaly aýa raıy men qardyń jyldam erýi – kóshkin júrý múmkindigin arttyratyn faktorlar. Oblysta kólik joldary men eldi mekenderge kóshkin qaýpin tóndiretin 336 ýchaske bar. Olardy «Qazseldenqorǵaý« ShQO fılıalynyń mamandary udaıy qadaǵalap otyrady. Únemi kóshkin qaýpi bar oshaqtarǵa jer ústi jáne aerovızýaldy monıtorıng júrgizilip, taýlarda qardyń jınalýy baqylanýda. Sondaı-aq qajet bolǵan jaǵdaıda jasandy jolmen qar kóshkini túsiriledi», - dep habarlady vedomstvo ókilderi.
Osy rette departament mamandary óńir jurtshylyǵyna taýly aımaqtarǵa barmaı, kóshkin qaýpi bar ýchaskelerde serýendeýden aýlaq bolý qajettigin eskertedi.
