ShQO-da apta sońyna deıin kóshkin júrý qaýpi saqtalady
ÓSKEMEN. QazAqparat – Shyǵys Qazaqstan oblysynda osy aptanyń sońyna deıin qar kóshkini júrý qaýpi saqtalady, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, óńirde qalyń qar jaýyp, qatty jel soǵýyna baılanysty taýly aımaqtarda kóshkin júrý qaýpi arta túsken. Soǵan oraı mamandar «Óskemen-Taýly Úlbi-Severnoe» tasjolynda 3 ret jasandy jolmen qar túsirdi. Barlyǵy 38700 tekshe metr qar túsip, joldy tolyǵymen jaýyp qalǵan.
«Oblysta kóshkin qaýpi 7 naýryzǵa deıin saqtalady. Búgin aýa raıyna baılanysty eskertý de jarııalanǵan. Osy rette, turǵyndarǵa taýǵa barýdy shekteýdi suraımyz. Kóshkin júrýy yqtımal taýly aımaqtarda qaýipsizdik erejelerin saqtańyzdar!. Kóshkin qaýpi joǵary ýchaskelerde júrgen kezde esh toqtamańyz jáne ol jerden jyldam ótip ketýge tyrysyńyz!», - dep habarlady vedomstvo ókilderi.
Esterińizge sala ketsek, osyǵan deıin ShQO-da 94 eldi mekendi sý basý qaýpi bar ekendigi habarlanǵan.
