ShQO-da apatty jaǵdaıdaǵy Orta Terekti sý qoımasynda sý tasqyny kezeńinde mamandar kezekshilik etedi
ÓSKEMEN. KAZINFORM – Shyǵys Qazaqstan oblysy Marqakól aýdanyndaǵy Orta Terekti sý qoımasynda sý tasqyny kezeńinde mamandar kezekshilik etedi.
Marqakól aýdanyndaǵy Orta Terekti sý qoımasy apatty jaǵdaıda tur. Eger ony jóndemese aýdan ortalyǵyndaǵy 134 úıdi sý basýy múmkin. Búgin Shyǵys Qazaqstan oblysynyń ákimi Ermek Kósherbaev jumys saparymen Marqakól aýdanyna baryp, osy sý qoımasynyń jaǵdaıymen tanysty.
- Ótken jyly onyń tehnıkalyq jaı-kúıine saraptama jasalyp, jóndeý jumystarynyń qajet ekeni aıtylǵan edi. Tıisti jumystar aýa raıynyń qolaıly kezeńinde bastaldy. Sý aǵyzǵyshtyń negizi betondalyp, sý qoımasynyń túbine tor tóseldi. Oblys ákimi jergilikti halyqpen kezdesip, sý qoımasynyń byltyr qalaı jumys istegenin surady. Qazirgi ýaqytta turǵyndarǵa qaýip tónip turǵan joq. Negizgi qurylymdar shtatty rejımde jumys istep jatyr. Sý tasqyny bastalǵan kezde mamandar kezekshilikke shyǵatyn bolady, - dep habarlady ShQO ákiminiń baspasóz qyzmetinen.
Bıyl Orta Terekti sý qoımasynyń bógetin josparly túrde qaıta jańǵyrtýdyń jobalyq-smetalyq qujattamasyn ázirleý josparlanyp otyr.
Eske salsaq, buǵan deıin apatty jaǵdaıdaǵy Orta Terekti sý qoımasy jaıly saraptamalyq maqala jazǵanbyz.