ShQO-da apatqa baılanysty jylýsyz qalǵan 9 aýylǵa qaıtadan gaz berilip jatyr

ÓSKEMEN. QazAqparat – Shyǵys Qazaqstan oblysy Zaısan aýdanyndaǵy 9 aýyl qaıtadan gazben qamtylýda, dep habarlaıdy QazAqparat tilshisi.

1 qarasha kúni saǵat 12.00-de Zaısan aýdanyndaǵy 9 aýyldy gazben qamtamasyz etetin joǵary qysymdy magıstraldyq qubyrdan gaz shyǵyp, sonyń saldarynan eldi mekender gazsyz qalǵan edi.

Atap aıtqanda, Qarabulaq, Keńsaı, Qaınar, Aınabulaq, Jambyl, Kógedaı, Shalqar, Qaratal, Úlken Qaratal aýyldary.

«Magıstraldyq gaz qubyryn jóndeý jumystary aıaqtaldy. Qazirgi ýaqytta aýyldarǵa gaz taratylyp jatyr. «QazTransGaz», «Intergaz» mekemeleriniń mamandary gaz retteý jumystaryn júrgizý úshin ár aýylǵa barady. Olar arnaıy qurylǵan shtab múshelerimen birge úılerdi aralap shyǵady», - dep habarlady aýdan ákimdiginen.