ShQO-da anyqtalǵan aýsyl derti Qytaıdan ákelingen asyl tuqymdy maldan taraǵan joq - N.Jaqypbaev
ASTANA. 31 qańtar. QazAqparat /Qanat Mámetqazyuly/ - Elge ákelingen asyl tuqymdy maldardan asa qaýipti aýrý belgileri tabylǵan joq.
Búgin Aýyl sharýashylyǵy mınıstrliginde ótken brıfıng barysynda Veterınarlyq baqylaý jáne qadaǵalaý komıtetiniń tóraǵasy Nyǵmet Jaqypbaev osylaı málim etti.
Komıtet tóraǵasynyń aıtýynsha, búgingi tańda Amerıka, Kanada, Avstralııa men Eýropa elderinen 17 myńnan astam asyl tuqymdy mal basy ákelindi. Bul rette sharýashylyq sýbektilerine ákelingen iri qara karantınnen tolyq ótti.
«Olardan asa qaýipti aýrý belgileri tabylǵan joq», - deıdi N. Jaqypbaev.
Onyń aıtýynsha, memleket tarapynan osy baǵyttaǵy bıznesti qoldaý jumystary turaqty júrgizilip keledi. «Árıne, shetelden ákelinetin asyl tuqymdy malǵa qatysty áńgimeler kóp. Degenmen, Shyǵys Qazaqstan oblysyndaǵy aýsyl aýrýynyń shyǵýyna baılanysty jańsaq aqparattar taratylǵanyn eske salǵym keledi. Máselen, keıbir BAQ jarııalaǵandaı aýsyl derti Qytaıdan ákelingen asyl tuqymdy maldan taraǵan joq. Onyń naqty taralý oshaǵy shekara mańyndaǵy Qytaıdan kelgeni anyq. Alaıda ol jabaıy ań-qus nemese adamdar arqyly bergi jaqqa juqqan bolýy kerek», - deıdi N. Jaqypbaev.
Budan bólek, Komıtet tóraǵasy búgingi tańda qazaqstandyq veterınarlyq sertıfıkattar máselesine toqtalyp ótti. Onyń aıtýynsha, qazirgi kúni sertıfıkattar Polsha, Lıtva, Kanada, Vengrııa, Chehııa, AQSh, GFR, Gollandııa elderimen kelisilgen, soǵan qosa Qytaı jáne Lıvan, Evropa odaǵynyń basqa elderimen kelisý jumystary jalǵasyp jatyr.
