ShQO-da «Ańsaǵan sábı» baǵdarlamasy boıynsha tuńǵysh náreste dúnıege keldi

ÓSKEMEN. QazAqparat – Shyǵys Qazaqstan oblysynda «Ańsaǵan sábı» baǵdarlamasy boıynsha tuńǵysh náreste dúnıege keldi, dep habarlaıdy QazAqparat tilshisi.

«Áleýmettik medıtsınalyq saqtandyrý qory» ShQO fılıaly baspasóz qyzmetiniń málimetine súıensek, óńirde «Ańsaǵan sábı» baǵdarlamasy boıynsha EKO arqyly tuńǵysh náreste jaryq dúnıe esigin ashty.

«Bul baqytty sátterin alǵash ret ata-ana atanyp otyrǵan erli-zaıypty 2016 jyldan beri kútken. 35 jastaǵy áıel adam ekstrakorporaldi uryqtandyrý arqyly MÁMS júıesi aıasynda bala kóterip, aman-esen bosandy», - delingen aqparatta.

Búginde ana men bala ózin jaqsy sezinedi. Uldyń salmaǵy - 3661 gramm, boıy - 52 sm.

«Ózimizdi sondaı baqytty sezinýdemiz. Barlyq jumystar tegin bolyp, otbasymyzdan esh shyǵyn shyqqan joq. Ulymyzdyń atyn Mark dep qoıdyq», - dedi Óskemen qalasynyń turǵyny Alena Dolgıh.