ShQO-da ań aýlaý erejesin buzǵan 400-den astam adam jaýapqa tartyldy

ÓSKEMEN. QazAqparat – Shyǵys Qazaqstan oblysynda ań aýlaý erejesin buzǵan 400-den astam adam anyqtaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda 1 aı boıy «Brakoner» jedel aldyn alý sharasyn júrgizgen. Sonyń barysynda 411 reıd ótkizilip, tabıǵat qorǵaý zańnamasyn buzýdyń 617 faktisi tirkeldi.

«Onyń ishinde ań aýlaý erejelerin buzǵan – 426, balyq aýlaý talaptaryn saqtamaǵan – 141, qarýdy esepke alý, saqtaý, paıdalaný tártibin buzǵan – 41 adam jaýapqa tartyldy. Zańsyz aǵash keskeni úshin segiz azamatqa QR ÁQBtK-niń 381-babyna sáıkes aıyppul salynǵan», - delingen aqparatta.

Sonymen qatar polıtsııa qyzmetkerleri 12 qylmysty anyqtady. Onyń ishinde ańdy jáne balyq resýrstaryn zańsyz aýlaǵan 8 adam bar.