ShQO-da «Ámire» fılminiń kórsetilimi júrip jatyr
ASTANA. QazAqparat - Shyǵys Qazaqstanda «Ámire» fılminiń kórsetilimi júrip jatyr. Kınotýyndy jaryq juldyz, qazaqtyń tuńǵysh dramalyq tenor daýysy, birtýar ánshi - Ámire Qashaýbaevqa arnalǵan, dep habarlaıdy QazAqparat óńirlik ákimdiktiń baspasóz qyzmetine siltememen.
Aıta ketý kerek, birtýar tulǵa Shyǵys Qazaqstannyń Qaınar aýylynda dúnıege kelgen. Bıyl onyń 130 jyldyq mereıtoıy toılanýda.
Qala turǵyndarymen birge týyndyny oblys ákimi Danıal Ahmetov te tamashalady. Aımaq basshysy fılm kórermenge ádettegi týyndylardaǵydaı kóshpeli eldiń turmysynyń beınesin emes, qazaq bolmysynyń basqa qyryn jetkizgenin aıtady.
«Biz Eýropadaǵy ómirdiń bir sátin jáne Ámire Qashaýbaevtyń basqa beınesin kóre aldyq. Ol tek týma talant emes, eń birinshi, uly dala mádenıetiniń beınesi. Sondaı-aq, áıgili ánshiniń ishki mádenıetiniń tereńdigin tanı aldyq. Árıne, onyń bári keýdege erekshe sezim uıalatady. Aıtarym, bul fılmde Eýropany tánti etken bizdiń joǵary mádenıetimiz kórsetilgen», - dedi Danıal Ahmetov.
Ámire Qashaýbaev 1925 jyly EXPO aıasynda Búkilálemdik mýzykalyq baıqaýǵa, Parıjge attanady. Frantsııa astanasynda ol KSRO delegatsııasynyń ártisi retinde tórtkúl tarapty dúr silkindirip, kúmis júldeni jeńip alady. Ol Eýropa buqarasyna birinshi bolyp qazaqtyń vokaldyq-oryndaýshylyq ónerin kórsetip, ulttyq aspaby - dombyrany tanytady.
«Fılm bizdiń qazaq zııalylary aıaýsyz qýǵyn-súrginge ushyraǵan tarıhı kezeńdi baıan etedi. Fılmde ol týraly anyq kórsetilmese de, sol sum jyldardyń alǵashqy paraqtaryn ashady. Biz ol týraly bilemiz jáne tarıhtyń bul kezeńi tereń zerttelýi tıis», - dedi ShQO ákimi.
Aıta ketsek, fılmde Ámire oryndaýynda "Balqadısha", "Úsh dos", "Dýdar-aı" jáne "Bes qarager" ánderi oryndaldy. Túsirilim Latvııada, Los-Andjeleste, sondaı-aq, Almaty oblysynyń Úshqońyr aýylynda ótedi.
