ShQO-da Ámına Ómirzaqovanyń 100 jyldyǵyna oraı retro-festıval ótti
ASTANA. QazAqparat - Óskemende Qazaqstannyń Halyq ártisi qazaq teatry men kınosynyń ańyzy bolǵan Ámına Ómirzaqovanyń 100 jyldyq mereıtoıyna baılanysty A.Pýshkın atyndaǵy oblystyq kitaphanasynda «Ámına: búkil ǵumyry - mahabbat» atty retro-festıval uıymdastyryldy. Mereıtoı ıÝNESKO kóleminde atalyp ótýde, dep habarlaıdy QazAqparat.
Aǵaıyndy Abdýllınder atyndaǵy Shyǵys Qazaqstan óner koledjiniń mýzykanttary oryndaǵan Ámına Ómirzaqovanyń qatysýymen túsirilgen fılm áýenderi, ásirese, «Taqııaly perishte» fılmindegi «Ana» áni, kitaphanaǵa kelip, qazaq dalasy túletken daryn ıesine taǵzym etken talaı jastyń boıynda akterge degen asqan qurmet pen zor maqtanysh sezimin uıalatty.
Oblystyq qyzmet kórsetý kolledjiniń stýdentteri retro kıimder men shash qoıý úlgileriniń kórsetilimin usynyp, Ámına Erǵojaqyzynyń qatysýymen túsirilgen fılmderde, ótken ǵasyrdyń 50-70-shi jyldary qalyptasqan sán úlgilerin meılinshe jetkizgendeı boldy.
«Mundaı shash qoıý úlgisin men erterekte apamnyń foto sýretterinen kórýshi edim... Óz ereksheligimen ádemi eken. Búgingi kún talǵamyna da keletin sııaqty. Tipti, «uqsas úlgide bir kóılek tiksem be dep» oılanyp ta qoıdym» - deıdi, S.Amanjolov atyndaǵy Shyǵys Qazaqstan memlekettik ýnıversıtetiniń stýdenti Qalamqas Dáýletova.
Ámına Ómirzaqova Qazaqstannyń halyq ártisi Doshan Joljaqsynovqa tálimgerlik jasap, onyń akter bolyp qalyptasýyna erekshe yqpal jasaǵan óner qaıratkeri. Bul týraly, akterdyń jerlesterine arnap joldaǵan beınebaıannan belgili boldy. Munymen qosa, Ámına Erǵojaqyzynyń ónerdegi áriptesi, Qazaqstannyń Halyq ártisi Roza Áshirbekova, óner maıtalmanynyń búkil shyǵarmashylyq ǵumyry ótken Ǵabıt Músirepov atyndaǵy qazaq memlekettik akademııalyq balalar jáne jasóspirimder teatry janyndaǵy mýzeı jádigerleri týraly jan-jaqty baıandap jastar tanymyn arttyrdy.
«Shabyt» stýdentter teatrynyń «Taqııaly perishte» fılminen usynylǵan jarqyn sahnalyq qoıylym da kórermen qýanyshyn eseledi.
«Ámına Ómirzaqova - meniń úlgi etip, qurmet tutatyn tulǵam. Bes jasymnan onyń ónerine yntyqpyn. Kúmis kúlkisi, jarqyn júzi, ot janary men jaıdary minezi - meni árkez shabyttandyryp, jigerlendiredi» - deıdi teatr tárbıelenýshisi Aıbota Shanjın.
Ámına rólderin somdaý úshin júrektiń batyrlyǵy qajet. Buǵan úlken daıyndyq pen ishki rýhanı qýat-kúsh qajet. Solaı bola tura, festıvalge kelgen kórermen qaýym arasynan da sahnalyq obrzdardy somdap kórýge asyq jastar az bolǵan joq. Demek, Ámına - halyq júreginde!
«Ámına Ómirzaqova - Qazaqstannyń ulttyq qundylyǵy! Búgingi festıval - dańqty jerlesimizdiń ǵasyr toıyn atap ótýge arnalǵan keshendi sharalar leginiń alǵashqy parasy ǵana. Aldymyzda, uly esimdi ulyqtar talaı sharalar kútip tur. Olardyń qatarynda Semeı qalasynda ótetin respýblıkalyq teatrlar festıvaliniń orny erekshe» - dedi Shyǵys Qazaqstan oblysy ákiminiń orynbasary Ásem Núsipova óz sózinde.
Bul aıtýly sharaǵa oblys ákimdigi búkil qazaqstandyqtardyń sheksiz súıispenshiligine ıe bolǵan jerlesiniń shyǵarmashylyǵy men ómiri jaıly keń kólemde mádenı-tanymdyq baǵdarlama ázirleý ústinde.
