ShQO-da «Alyp Altaı» atty halyqaralyq festıval ótedi
ASTANA. QazAqparat - Tamyz aıynyń 12-19 juldyzy aralyǵynda Shyǵys Qazaqstan oblysynda «Alyp Altaı. Great Altai. Qazaqstan - 2017» týrıstik-sporttyq festıvali ótedi. Saıysqa Qazaqstan, Reseı, Qytaı men Mońǵolııanyń sportshylary qatysady, dep habarlaıdy «QazAqparat» HAA tilshisi.
Atalǵan shara Shyǵys Qazaqstan oblysynyń ákimdigi, «Altaı - bizdiń ortaq úıimiz» halyqaralyq úılestirý keńesi hatshylyǵy men RF Altaı aımaǵynyń balalar jáne jastar qaýymdastyǵynyń qoldaýymen ótkizilip otyr.
Festıvaldiń baǵdarlamasy boıynsha sharanyń ashylý saltanaty 12 tamyzda Óskemende bastalyp, 13 tamyzda Katonqaraǵaı aýdanynyń Kókterek aýylynyń jáne 14-16 tamyz aralyǵynda Jańaúlgi aýylynyń mańynda jartasqa órmeleý, paraplanerızm, jaıaý júrý, taýǵa shyǵý, sýda júzý, velotýrızm, raftıng, alpınızm, jartasqa órmeleý, balyq aýlaý, mamandandyrylǵan avto-moto rallı jáne ulttyq sport túrleri boıynsha saıystar ótkiziledi. Balyq aýlaý, sýda júzý syndy tabıǵı sport túrlerinen saıystar Buqtyrmanyń jaǵasynda ótedi.
Bıylǵy jyly festıvaldi uıymdastyryp otyrǵan Qazaqstan tarapy baǵdarlamaǵa Qazaqsha kúres, Buqasha tartys men qol kúresin engizgen.
«Alyp Altaı. Great Altai. Qazaqstan - 2017» festıvali - ár eldiń sportshylarynyń qatysýymen ótetin, tabıǵat aıasyndaǵy birneshe sport túrin biriktirgen buqaralyq, týrıstik ári sporttyq shara. Atalǵan festıvaldi jyl saıyn tórt el: Qazaqstan, Reseı, Mońǵolııa jáne Qytaı memleketteri kezek-kezek ótkizýdi izgi dástúrge aınaldyrǵan. Festıval ShYU-nyń sharalar josparyna enip, «Altaı - bizdiń ortaq úıimiz» uranymen ótkizilmek.
