ShQO-da alty esirtki tasymaldaý kanaly áshkerelendi
ShQO Polıtsııa departamenti baspasóz qyzmetiniń málimetine súıensek, jyl basynan beri óńirde 240 esirtki qylmysy anyqtaldy. Onyń ishinde 154-i esirtki saýdasyna qatysty bolyp otyr. Jalpy oblys boıynsha túrli esirtkiniń 281 kelisi (onyń 263 kelisi marıhýana) tárkilengen. Sondaı-aq alty esirtki tasymaldaý kanaly áshkerelendi (Almaty qalasynan - 4, Nur-Sultan qalasynan jáne Jambyl oblysynan - 1-den).
«Barlyǵy 5 qylmystyq toptyń joly kesildi. Quramynda 5 adam bolǵan bul toptardyń birinen 3,5 keli sıntetıkalyq esirtki tárkilengen. Kúdiktilerge qatysty sotqa deıingi tergeý amaldary júrgizilýde», - deıdi ShQO PD bastyǵy Saǵat Mádıev.
Endi bir toptan 169,5 gramm «jyldamdyq» atty psıhotropty zat tabylsa, qalǵan 3 toptan 75 keli marıhýana men 10 keli gashısh tárkilendi. Budan bólek, esirtkini Qazaqstan shekarasy arqyly Reseıge ótkizý faktisi anyqtaldy.
Tártip saqshylary psıhotropty zattar satylatyn jerler kórsetilgen 112 graffıtı sýretti joıǵan. Áleýmettik jelilerde esirtkini nasıhattaýmen jáne taratýmen aınalysqan 73 akkaýnt buǵattaldy.
