ShQO-da alıment tólemegen adam alǵash ret túrmege qamaldy

ÓSKEMEN. KAZINFORM – Shyǵys Qazaqstan oblysynda alıment tólemegen adamǵa birinshi ret bas bostandyǵynan aıyrý jazasy taǵaıyndaldy.

ShQO Polıtsııa departamenti baspasóz qyzmetiniń málimetine súıensek, 43 jastaǵy er adam kámeletke tolmaǵan balasyna alıment tólemegeni úshin 9 aıǵa bas bostandyǵynan aıyryldy. Onyń alıment boıynsha qaryzy 2 mıllıon teńgeden asqan.

«Ol óz mindetterin oryndaýdan birneshe ret jaltaryp, eskertýlerge qaramastan esh áreket etpedi. Sondyqtan sot organdary oǵan qatań shara – bas bostandyǵynan aıyrý jazasyn qoldaný týraly sheshim qabyldady. Bul jaǵdaı alıment tóleý boıynsha mindetterin júıeli túrde oryndaýdan jaltaryp júrgen adamdarǵa qandaı sanktsııalar qoldanylatynyn kórsetedi», - delingen aqparatta.

Zańnamaǵa sáıkes, alıment tólemeýdiń saldary aıyppulmen ǵana shektelmeı, qylmystyq jaýapkershilikke, tipti bas bostandyǵynan aıyrý jazasyna ákelip soǵady. Shyǵys Qazaqstanda mundaı jaza birinshi ret qoldanylyp otyr.

Aıta keteıik, óńirde jyl basynan beri alıment tólemeý faktileri boıynsha sotqa 36 qylmystyq is sotqa joldanǵan.

Eske salsaq, osyǵan deıin ShQO-da balasyna 3 mln teńge alıment tólemegen er adamǵa kólik aıdaýǵa tyıym salynǵany habarlanǵan.