ShQO-da alǵashqy óńirlik ǵylym keńesi ótti
ÓSKEMEN. KAZINFORM — Búgin Óskemen qalasynda D. Serikbaev atyndaǵy Shyǵys Qazaqstan tehnıkalyq ýnıversıteti bazasynda alǵashqy óńirlik ǵylym keńesi ótti.
Onyń basty maqsaty — ǵylym men qoǵam arasyndaǵy baılanysty nyǵaıtý, Shyǵys Qazaqstan oblysynyń ǵylymı-tehnıkalyq áleýetin arttyrý. Keńes oblys ákimdigi men tehnıkalyq ýnıversıtettiń tikeleı yntymaqtastyǵy aıasynda quryldy. Qazirgi ýaqytta óńirde birqatar ǵylymı jobalar júzege asyrylyp jatyr, Shyǵys Qazaqstan ǵalymdarynyń kóptegen ázirlemeleri óndiriste qoldanylýda. Sondyqtan qazirgi tańda ǵylymı orta men óndiris arasyndaǵy baılanysty nyǵaıtý asa mańyzdy, bul ıdeıalar men jobalardyń júzege asýyna yqpal etedi.
— Keńes bılik, ǵylym jáne bıznes arasyndaǵy dıalog alańy bolmaq. Eger bizdiń ǵalymdar men ónerkásip salasynyń ókilderi birlese jumys isteıtin bolsa, ǵylymı ıdeıalardy tabysty iske asyryp, óndiriste jańa jetistikterge qol jetkizýge bolady degen senim bar, — dedi oblys ákimi Nurymbet Saqtaǵanov.
Sondaı-aq óńirlik ǵylym keńesine onlaın formatta QR Ǵylym jáne joǵary bilim mınıstri Saıasat Nurbek qatysty.
— Bizdiń maqsatymyz — óndiristik mindetterdi sheshý úshin ýnıversıtetterdiń barlyq áleýetin jumyldyrý. Aımaqtyq joǵary oqý oryndarynda qalyptasyp jatqan ósý núktelerin ǵylymı-tehnıkalyq máselelerdi tıimdi sheshýge paıdalaný mańyzdy. Qanysh Sátbaevtyń «Tek óndiris ómirimen tyǵyz baılanysqan, óndiristiń damýyna kómektesetin ári ony joǵary tehnologııalyq deńgeıge kóteretin ǵylym ǵana aldyńǵy qatarly ǵylym bola alady» degeni bar, — dedi Saıasat Nurbek.
Keńes óńirlik syn-tegeýrinder men mindetterdi eskere otyryp, ǵylymdy damytýdyń basym baǵyttaryn aıqyndaıtyn strategııalyq fýnktsııany atqarady, praktıkalyq baǵyttaǵy zertteý qyzmetin damytýǵa yqpal etedi. Sonymen qatar, keńes otyrystarynda qatysýshylar qosymsha qarjylandyrýdy nemese vedomstvoaralyq kelisimdi qajet etetin bastamalar, ǵylymı jobalar men baǵdarlamalardy talqylaýǵa shyǵara alady.
ShQO-daǵy alǵashqy óńirlik ǵylym keńesi aıasynda D. Serikbaev atyndaǵy Shyǵys Qazaqstan tehnıkalyq ýnıversıtetinde «Qorǵanysh jáne fýnktsıonaldyq jabyndar» atty Jastar ǵylymı ortalyǵynyń ashylýy ótti.
Aıta keteıik, sáýir aıynyń ortasyna qaraı dál osy joǵarǵy oqý ornynda XI Halyqaralyq konferentsııa uıymdastyrylǵan bolatyn. «Jastar shyǵarmashylyǵy — Qazaqstannyń ınnovatsııalyq damýyna» atty konferentsııaǵa stýdentter, magıstranttar, doktoranttar jáne jas zertteýshiler qatysqan. Sharanyń maqsaty — jas ǵalymdardy jan-jaqty qoldaý, olardyń áleýetin damytý, bilim men tájirıbe almasý, kásibı baılanystar ornatý.
ShQO ákimi Nurymbet Saqtaǵanov ta konferentsııaǵa qatysyp, birqatar ǵalymǵa Alǵys hattar tabys etken.
Búginde Shyǵys Qazaqstan ǵalymdary keleshegi zor baǵyttardy damytyp, jańa materıaldar men tehnologııalardy jasap jatyr. Olar stýdentter men jas áriptesterin zertteý jobalaryna belsendi tartýda, ári óńir men eldiń damýyna zor úles qosyp keledi.