ShQO-da áleýmettik mańyzy bar azyq-túlik baǵasyn ósirgen 100 kásipkerge aıyppul salyndy
ÓSKEMEN. KAZINFORM — Shyǵys Qazaqstan oblysynda saýda erejelerin buzǵan kásipkerler jaýapqa tartylyp jatyr.
ShQO Saýda jáne tutynýshylardyń quqyqtaryn qorǵaý departamentiniń málimetine súıensek, óńirde jyl basynan beri áleýmettik mańyzy bar azyq-túlik taýarlaryna belgilengen baǵany ruqsat etilgen shekten asyryp jibergen 100 kásipkerge jalpy somasy 1 224 725 teńge aıyppul salyndy. Sondaı-aq taýarlardyń baǵasyn kórsetý kezinde zań talaptaryn buzǵan 46 kásipker ákimshilik jaýapkershilikke tartyldy.
— «Saýda qyzmetin retteý týraly» zańǵa sáıkes, áleýmettik mańyzy bar azyq-túlik taýarlaryna arnalǵan saýda ústemesi óndirýshiniń nemese jetkizýshiniń baǵasynan 15 paıyzdan aspaýǵa tıis. Biz jetkizýshilerdiń qyzmetine erekshe nazar aýdaramyz. Óıtkeni olardyń belgileıtin baǵasy dúkenderdegi azyq-túlik qunyna tikeleı áser etedi. Bıyl elektrondyq shot-faktýralardy taldaý nátıjesinde 40 jetkizýshi jaýapkershilikke tartyldy, — delingen aqparatta.
Tuz, kúrish, qyzanaq, kartop jáne muzdatylǵan balyqtyń saýda ústemesin bekitý kezinde zańbuzýshylyqtar anyqtaldy. Belgilengen shekten eń joǵary asyrý balyq satý kezinde tirkeldi. Onyń saýda ústemesi 361 paıyzǵa jetken.
Sondaı-aq jıi kezdesetin zańbuzýshylyqtardyń qatarynda taýarlardyń baǵasyn jazyp qoımaý, sórelerdegi baǵa men kassada tóleý kezinde talap etiletin somanyń sáıkes kelmeýi de bar.
Іri dúkenderdiń birinde balalarǵa arnalǵan taýarlardyń baǵasy Reseı rýblimen kórsetilgen. Kásipkerge aıyppul salynyp, zańbuzýshylyqty joıý mindetteldi.
Eske salsaq, osyǵan deıin elde shujyq baǵasy qansha ekendigin jazǵanbyz.
