ShQO-da áleýmettik mańyzy bar azyq-túlik baǵasyn qymbattatýdyń 180 faktisi anyqtaldy

ÓSKEMEN. KAZINFORM – Shyǵys Qazaqstan oblysyndaǵy saýda oryndarynda áleýmettik mańyzy bar azyq-túlik baǵasyn bekitilgen shekten asyryp jiberýdiń 180 faktisi anyqtaldy. 

ShQO Saýda jáne tutynýshylardyń quqyqtaryn qorǵaý departamentiniń málimetine súıensek, 2024 jyly 27 mln teńgeden astam qarajat tutynýshylarǵa qaıtaryp berildi. Kásipkerlerdiń azamattar quqyǵyn shekteýi 2023 jylmen salystyrǵanda birshama ósken.

- Bir jyl ishinde satyp alǵan taýaryn qaıtarý, aýystyrý boıynsha oblys turǵyndarynan 920 ótinish kelip tústi. Bul aldyńǵy jylmen salystyrǵanda 75%-ǵa kóp. Negizinen turǵyndardyń bólshek pen elektrondyq saýdaǵa jáne kommýnaldyq qyzmetke kóńili tolmaıdy, - dedi departament basshysy Ashat Saǵıdoldın.

Byltyr áleýmettik mańyzy bar azyq-túlik baǵasyn tym qymbattatýdyń 180 faktisi anyqtaldy. Departament mamandarynyń aralasýynan keıin dándi daqyldardyń, jumyrtqanyń baǵasy tómendetildi.

Sondaı-aq 23 sot tutynýshylardyń tarapyna sheshilip, olarǵa 20 mln teńge qaıtaryldy.

Eske salsaq, buǵan deıin Shyǵys Qazaqstanda kartop tapshylyǵy joqtyǵy jaıly jazǵanbyz.