ShQO-da áleýmettik mańyzy bar azyq-túliktiń baǵasy turaqty
ÓSKEMEN. QazAqparat – Shyǵys Qazaqstan oblysynda áleýmettik mańyzy bar 19 túrli azyq-túlik ónimderiniń baǵasy turaqty, dep habarlaıdy QazAqparat tilshisi.
Búginde óńirde arzan baǵada azyq-túlik saýdalaıtyn 79 áleýmettik dúken jumys istep tur. Bul jaıly ShQO Óńirlik kommýnıkatsııalar qyzmetinde ótken onlaın-baspasóz brıfıngi barysynda oblystyq Kásipkerlik jáne ındýstrıaldyq-ınnovatsııalyq damý basqarmasy basshysynyń orynbasary Olga Grıgoreva málim etti.
«Jergilikti atqarýshy bılik ókilderi áleýmettik mańyzy bar azyq-túliktiń baǵasyna monıtorıng jasaýda. Jyl basynan beri aımaqtaǵy saýda oryndarynda nan, oramjapyraq, qant, sıyr eti men qaraqumyqtyń baǵasy óskeni anyqtaldy. Al qalǵan taýarlardyń baǵasy turaqty», - dedi ol.
ShQO Statıstıka departamenti mamandarynyń 2020 jyldyń 7 sáýirine deıin júrgizgen monıtorıngtiń qorytyndysyna súıensek, oblystaǵy áleýmettik taýarlardyń ındeksi 103,2%-dy quraǵan. Bul ortasha respýblıkalyq kórsetkishten 1,6% tómen.
