ShQO-da aldaǵy tórt jylda apatty jaǵdaıdaǵy 42 kópqabatty úı súrilmek
ÓSKEMEN. KAZINFORM – Shyǵys Qazaqstan oblysynda apatty jaǵdaıdaǵy úılerde turatyn halyqty kóshirý boıynsha óńirlik Jol kartasy bekitildi.
ShQO Qurylys basqarmasynyń málimetinshe, 2025 jyly boı kótergen úılerge 61 adam qonystanady. Aldaǵy tórt jyl ishinde apatty jaǵdaıdaǵy 42 kópqabatty úı súrilip, 218 adam jańa baspanamen qamtamasyz etiledi.
Baǵdarlamanyń birinshi kezeńinde 7 úıdiń turǵyndary jańa páterge kóshiriledi. Naqty aıtqanda:
Óskemende - 5 apatty úıden 29 turǵyn
Rıdderde - 1 úıden 7 adam
Beloýsovka kentinde - 1 úıden 25 turǵyn
– Beloýsovkadaǵy apatty jaǵdaıdaǵy úı halqyn kóshirýge jergilikti atqarýshy organnyń rezervinen 257,2 mln teńge bólindi. Osy jyldyń maýsym aıynyń sońyna deıin bul qarajatqa qajetti 25 páterdiń 24-i satyp alyndy, – dep habarlady basqarmadan.
Joba qalaı qarjylandyrylady?
Baǵdarlamany qarjylandyrý zańǵa sáıkes jergilikti bıýdjet, jeke jáne ózge de ınvestıtsııalar esebinen júzege asyrylady.
Jańa qarjy kózi retinde buǵan deıin jalǵa berilgen, biraq satyp alý quqyǵy bolmaǵan turǵyn úılerdiń jekeshelendirilýinen túsetin qarajat ta qarastyrylǵan. QR Ónerkásip jáne qurylys mınıstrligi 2017-2022 jyldary salynǵan jaldamaly úılerdi qaldyq quny boıynsha satyp alýǵa ruqsat etetin zańnamalyq ózgeristerdi engizdi. Bul qarjy renovatsııalyq jobalarǵa baǵyttalatyn bolady.
– Turǵyn úıdi jańǵyrtý turaqty qarjylandyrýdy qajet etedi. Burynǵy jaldamaly úılerdi jekeshelendirýden túsetin qarajat – apatty úılerden kóshýdi jedeldetetin naqty tetik. Mysaly, Óskemende osy kózden túsken qarajat kólemi 2023 jyly – 177,9 mln teńgeni, 2024 jyly – 112,7 mln teńgeni, 2025 jyldyń alǵashqy jartyjyldyǵynda – 85,4 mln teńgeni qurady, – dedi oblystyq Qurylys basqarmasynyń basshysy Rýfat Akramov.
Jospardyń oryndalý ýaqyty belgisiz
Alaıda qala ákimdiginiń habarlaýynsha, bólingen qarjy kólemi baǵdarlamany tolyq júzege asyrýǵa jetkiliksiz. Qosymsha qarjylandyrý da qarastyrylmaǵan.
– Respýblıkalyq bıýdjet shyǵystary qysqartylǵandyqtan, Óskemende apatty úıler turǵyndaryna páter satyp alý úshin oblystyq bıýdjetten qosymsha qarajat bólý týraly ótinim qoldaý tappady, – dep málim etti Qurylys basqarmasynan.
Jalpy esep boıynsha, 2025 jyly baǵdarlama aıasynda páterlerdi satyp alýǵa 558,5 mln teńge qajet. Onyń ishinde Óskemenge – 488,5 mln teńge, Rıdderge – 70 mln teńge.
Qoryta aıtqanda, renovatsııa baǵdarlamasynyń alǵashqy kezeńi tolyq júzege asa ma, joq pa, ázirge dóp basyp aıtý qıyn.
Eske salsaq, osyǵan deıin 2025 jylǵy alǵashqy alty aıda qurylys salasyndaǵy ósim 18,4%-ǵa jetkeni habarlanǵan.