ShQO-da alaıaqtar kásiporyn basshylarynan ákimdik atynan aqsha suraýda

Shyǵys Qazaqstan oblysynda alaıaqtar ákimdik atynan kásiporyn basshylaryna habarlasyp, qaıyrymdylyq sharalarǵa aqsha surap jatyr, dep habarlaıdy QazAqparat tilshisi.

ShQO ákimdiginiń málimetine súıensek, alaıaqtar ózderin ákimdik qyzmetkeri retinde tanystyrady.

«Keıingi kezde alaıaqtar asa belsendi bola bastady. Adamdardy aldaýdyń alýan túrli tásilin oılap tabatyn olar endi ózderin oblys nemese qala ákimdiginiń ókilderi retinde tanystyryp, kásiporyn dırektorlarynan qarjylyq qoldaý surap, keıde tipti talap etýge kóshken. Aıtatyn maqsattary ártúrli bolýy múmkin, máselen balalarǵa kómektesýden bastap, bılik uıymdastyratyn is-sharalardy qoldaýǵa, tipti keshki astyń uıymdastyrylýyna deıin ótinish jasaıdy. Bul – aldaý. Bılik keıde kásiporyndardy kómektesýge shaqyryp jatatyny ras, biraq munyń bári resmı túrde iske asyrylady», - delingen aqparatta.

Qaıyrymdylyq kómegin uıymdastyrý úshin ákimdik jazbasha ótinish jiberedi nemese arnaıy is-sharalar ótkizedi. Mundaı ótinishti qaıyrymdylyq kómek kórsetpes buryn aldyn ala tekserýge bolady.

«Kez kelgen qaıyrymdylyq sharasyna qatysý-qatyspaýdy kásipkerler ózderi sheshedi. Qaıyrymdylyq kórsetý ol – erikti túrde bolatyn áreket. Alaıaqtar qazir ózderin sheneýnik retinde tanystyrady. Keıde tipti bılik ókilderiniń naqty esimderi men laýazymdaryn ataıdy. Olar qujat ta usynýy múmkin. Mysaly, birkúndik kásiporynnyń shot-faktýrasyn nemese keıbir tulǵalarǵa resimdelgen jeke shottardy jiberedi», - delingen habarlamada.

Oblys ákimdigi telefon arqyly eshqandaı da aqsha jınaý aktsııasy júrgizilmeıtinin málimdedi. Kásipkerler mundaı aıla-sharǵyǵa aldanyp qalmas úshin muqııat bolýy qajet. Shottardy tólemes buryn nemese alaıaqtardyń aıtýymen qarajatty aýdarmas buryn aqparatty tekserip alǵany jón.