ShQO-da alaıaqtar «baılanys kompanııasynyń qyzmetkeri» bolyp halyqty aldap jatyr

ÓSKEMEN. KAZINFORM — Shyǵys Qazaqstan oblysynda alaıaqtar ózderin «Qazaqtelekom» qyzmetkerleri retinde tanystyryp, halyqtyń qaltasyn qaǵa bastady.

ShQO Polıtsııa departamentiniń málimetinshe, óńir boıynsha zııandy qosymshalar arqyly aqsha urlaý faktileri jıilep ketti.

— Áýeli alaıaqtar ózderin «Qazaqtelekom» qyzmetkerleri retinde tanystyrady. Odan soń baılanys qyzmetine jasalǵan kelisimsharttyń merzimi aıaqtalǵanyn habarlaıdy nemese «erekshe» jeńildikter usynady. Buǵan sendirgennen keıin WhatsApp messendjeri arqyly «derekterdi jańartý» nemese «jeńildikti iske qosý» úshin silteme jiberedi, — delingen aqparatta.

Silteme arqyly ótkennen keıin telefonǵa zııandy faıl júkteledi. Ony ornatqan sátten bastap qylmyskerler azamattyń bank qosymshalary men jeke derekterine tolyq qashyqtyqtan qol jetkizedi.

— Sol kezde telefon qatty qyzyp ketedi, ekran buǵattalyp nemese basqarý komandalaryna jaýap bermeı qalýy múmkin. Osyndaı jaǵdaıǵa tap bolsańyz telefondy qýat batyrmasyn uzaq basý arqyly óshirińiz. SIM-kartany shyǵaryp, ınternetti óshirińiz. Múmkindik bolsa, akkýmýlıatordy alyp tastańyz. Basqa qurylǵy arqyly bankpen shuǵyl baılanysyp, barlyq shottar men kartalardy buǵattap, 102 nómiri boıynsha polıtsııaǵa habar berińiz, — delingen habarlamada.

Baılanys operatorlarynyń qyzmetkerleri eshqashan messendjerler arqyly úshinshi tarap qosymshalaryn ornatýǵa arnalǵan siltemeler jibermeıdi.

Eske salsaq, osyǵan deıin Almatyda ınternet-alaıaqtyq isine qatysty 10-nan astam adam ustalǵany habarlanǵan.