ShQO-da alapat órtten 36 jastaǵy er adam kóz jumdy
ÓSKEMEN. QazAqparat - Shyǵys Qazaqstannyń Glýbokoe aýdanyna qarasty Jańa Úlbi kentinde sharýa qojalyǵynan órt shyqty, dep habarlaıdy QazAqparat tilshisi.
Órt tańǵy saǵat 4.00-de bastalǵan. Jer úıden shyqqan jalyn birtindep aýladaǵy qoraǵa kóshken. Órt sóndirýshiler kelgenshe qojalyq adamdary 60 sıyr men 8 jylqyny syrtqa shyǵaryp úlgeripti. Mashına eni tar kópirden óte almaǵan soń, tótenshe jaǵdaı ókilderi ózenge sorǵy ornatyp, sol arqyly sý shashqan. Tańǵy saǵat 8.00-de ǵana tilsiz jaýdyń aryny basylyp, ózge nysandarǵa jaıylý qaýpi joıyldy. Al saǵat 12.00-de qyzyl jalyn tolyqtaı sóndirildi.
«Tilsiz jaý 672 sharshy metrdi qamtyǵan. 400 sharshy metr aýmaq órt sóndirýshilerdiń arqasynda ottan aman qaldy. Órtengen aýmaqtan 1982 jyly týǵan er adamnyń máıiti tabyldy» - delingen oblystyq tótenshe jaǵdaılar departamenti taratqan málimette.
