ShQO-da alapat dala órtinen 200-den astam mal qyryldy
ÓSKEMEN. QazAqparat - Shyǵys Qazaqstan oblysy Úrjar aýdanynyń arnaıy komıssııasy ótken demalys kúnderi 3 myń gektardy sharpyǵan dala órti keltirgen shyǵyndy esepteýde.
«QazAqparat» HAA tilshisine bergen suhbatynda komıssııa basshysy aýdan ákiminiń orynbasary Serikqazy Sádýaqasovtyń aıtýynsha, osy kúnderi jumys toby 150 shaqyrymǵa sozylǵan aýmaqty tekserip shyqqan. Bastapqy málimet boıynsha, 12 otar órtenip, 212 mal (sonyń ishinde 202 bas qoı-eshki, 7 bas iri qara jáne 3 jylqy) ólgen.
Buryn QR ІІM TJK órt saldarynan 40 bas jylqy jáne 50 bas iri qara ólgenin málimdegen bolatyn.
«Bastysy, osy apatta adam shyǵyny bolǵan joq, qalǵan dúnıeniń orny tolady. Erteń tańerteń barlyq sharýa qojalyqtary men jergilikti ákimderdi jınaımyz. Órt apatynyń saldaryn talqylap, zardap shekken qojalyqtarǵa qalaı kómektesý jaǵyn oılastyramyz», - deıdi arnaıy komıssııanyń basshysy S. Sádýaqasov.
Onyń aıtýynsha, órttiń jalpy zalaly týraly aıtýǵa áli erte, aýmaq óte úlken, jumys toby táýlik boıy jumys istep jatyr.
«Órtti Qabanbaı aýylyna 5-6 shaqyrym, Alakól ózeniniń jaǵalaýyndaǵy demalys bazasynan birneshe shaqyrym qalǵanda sóndirýdiń sáti tústi», - dedi ol.
Eske sala ketsek, 9 jeltoqsanda Shyǵys Qazaqstan oblysynyń Úrjar aýdanynyń Qabanbaı aýylynda úsh myń gektardan astam jerdi órt sharpyǵan bolatyn. Qabanbaı aýylynan 8 kılometr qashyqtyqta ornalasqan qystaýlardan 21 adam, sonyń ishinde 8 bala qaýipsiz jerge kóshirildi. Kúshti jel men kóp jerdiń batpaqty bolýy órtti sóndirýdi qıyndatyp jiberdi.
