ShQO-da Alakóldiń kýrorttyq áleýetin damytý máseleleri talqylandy
ÓSKEMEN. QazAqparat – Shyǵys Qazaqstan oblysynyń ákimi Danıal Ahmetovtyń Úrjar aýdanyna jumys saparynda kásipkerler men múddeli memlekettik organdar Alakóldiń kýrorttyq áleýetin damytý máselesin talqylady, dep habarlaıdy QazAqparat.
Eske sala ketsek, Alakól jaǵasyn abattandyrý jumysy 2016 jyldan beri júrgizilip keledi. Bul ýaqytta demalys aımaǵy aıtarlyqtaı keńeıdi. Qazirgi ýaqytta 333 kásipkerlik nysan týrısterge qyzmet kórsetedi, onyń ishinde 175 demalys úıi, 2 qonaq úı, 29 dúken men 56 dúńgirshek, 10 dámhana, 4 bar, eki meıramhana, 8 ashana jáne aspazdyq, eki dárihana men akvapark bar.
Óńir basshysynyń aıtýynsha, kelesi jyly demalys jaılylyǵyn arttyrý úshin birqatar iri ınfraqurylymdyq jobalardy júzege asyrý josparlanyp otyr. Danıal Ahmetov shaǵyn jáne orta bıznes ókilderiniń óz mindetterin atqaryp, salyqtan jaltarmaý qajettigin basa aıtty.
ShQO Memlekettik kirister departamenti basshysynyń orynbasary Erjan Ktanov shildeniń alǵashqy 11 kúninde 38 kásipkerdi «kóleńkeden» shyǵarǵanyn aıtty. 11 demalys aımaǵy esepke qoıyldy.
«2018 jyly aýdan bıýdjetine kásipkerlik sýbektilerinen 67,5 mln teńge salyq túsken. Bıyl salyq túsiminiń kólemi 100 mln teńgege jetedi dep kútilýde. Alaıda, áli kúnge deıin óz tabysy týraly jalǵan aqparat berip, salyq tóleýden jaltaratyn demalys oryndarynyń ıeleri bar. Biz tekserý júrgizip, onlaın baqylaý-kassa mashınalarynyń ornatylǵanyn tekseremiz», - dedi Erjan Ktanov.
Alakól kóliniń jaǵasyn abattandyrý máselesi boıynsha arnaıy jumys toby qurylǵan. Úrjar aýdanynyń ákimi Serik Zaınýldın atap ótkendeı, aldaǵy ýaqytta 30 mlrd teńge bolatyn jobalardy júzege asyrý josparlanǵan. Sondaı-aq, jobanyń aıasynda kóldiń eki shaqyrym jaǵalaýyn nyǵaıtý josparlanyp otyr. Bul joba «Aqtaý teńiz porty» qurylysynyń tájirıbesine sáıkes júzege asyrylady. Odan bólek, sýmen jabdyqtaý jelileri men sý jınaý qondyrǵylaryn, sondaı-aq káriz jelilerin, sarqyndy sýlardy tazartý qondyrǵylaryn jáne súzgileý alańdaryn salý kózdelgen. Jobalardyń jobalyq-smetalyq qujattary memlekettik saraptamaǵa jiberilgen.
Elektr energııasymen turaqty túrde qamtamasyz etý úshin Maqanshy aýylynan Kóktalǵa deıin qýaty 110 kVT bolatyn elektr jelisi turǵyzylady.
Úrjar aýylynda áýejaıdyń ushý-qoný jolaǵyn qaıta jóndeýge arnalǵan jobalyq-smetalyq qujattamany ázirleý jumystary aıaqtaldy. Joba arqyly eki baǵyt boıynsha ushaq qondyrý, jolaq uzyndyǵyn 2100 metrge deıin jáne enin 45 metrge deıin ulǵaıtýǵa, joǵary qarqyndy shamdarǵa arnalǵan jaryqtandyrý quraldaryn ornatý, saǵatyna 70 jolaýshyǵa qyzmet kórsetetin jańa termınaldyń qurylysy jáne qoldanystaǵy termınaldyń ákimshilik ǵımaratyn qaıta jańartý kózdelgen. Osydan keıin áýejaı 70-80 orynǵa deıingi shaǵyn ushaqtardy qabyldaı alady.
«Eki jylda jaǵalaýdy damytýǵa óte kóp qarajat bólindi. Aldaǵy tórt jylda otandyq týrıster ǵana emes, sheteldikter de kelýi úshin jumys isteımiz. Jaqynda emdik sýdy qubyrmen tartatyn aýstrııalyq tájirıbeni zertteımiz jáne jyl boıy jumys isteıtin emdik-saýyqtyrý keshenin salamyz», - dedi óńir basshysy Danıal Ahmetov.
Qazirgi ýaqytta Óskemen – Qalbataý aýyly – Semeı – Aıagóz joly shyǵystaǵy ózekti máselelerdiń birine aınaldy. Aldaǵy eki jylda jol jóndeý jumystary aıaqtalady. Qabanbaı aýylynan Alakólge deıin 2,6 shaqyrym velosıped joly salynady. Sonymen birge, demalys nysandarynda órtke qarsy qaýipsizdik erejeleri men sanıtarlyq talaptardyń saqtalýyna basa mán beriledi.
