ShQO-da aqyn Tursynhan Ábdirahmanovaǵa eskertkish qoıyldy
ASTANA. QazAqparat - Shyǵys Qazaqstan oblysyndaǵy Jarma aýdanynyń ortalyǵynda belgili aqyn, fılologııa ǵylymdarynyń doktory, halyq jazýshysy Tursynhan Ábdirahmanovaǵa eńseli eskertkish ashyldy, dep habarlaıdy QazAqparat.
Іs-shara Jarma óńiriniń 90 jyldyq mereıtoıymen ushtastyrylyp otyr. Jıylǵan qalyń kópshiliktiń aldynda el aǵalary jalpy bıikti 6 metrge jýyq eskertkishtiń aq jabýyn túsirdi.
Saltanatty jıyndy ashqan jazýshy Sábıt Dosanov úsh birdeı salanyń maıtalmany atanǵan Tursynhan Ábdirahmanovany ulyqtaǵan jarmalyqtarǵa alǵys bildirdi.
«Ádebıettegi jazýshylar qaýymy atynan osyndaı úlken jumys jasaýdy erlikpen para-par qadam dep baǵalaımyn. Óz mádenıetin kótergen el qashanda kóp jasaıtyndyǵy tarıhtan belgili. Al máńgilik eldi murat etip, rýhanı jańǵyrýymyzdy jańǵyrtýda osyndaı sharalardyń orny erekshe. Sol sebepti Tursynhan Ábdirahmanovany ulyqtaý isiniń týǵan ólkesinde bastaý alyp otyrǵandyǵy kóńil qýantarlyq is»,- dedi qoǵam qaıratkeri.
Jarma aýdanynyń birinshi ákimi Tóleýberdi Áýbákir, Jarma óńiri tól perzentin ulyqtap, esimin qaıta jańǵyrtqan ıgiligi men izgiligi mol is ekendigin alǵa tartty.
«Tarıhqa, mádenıetke jáne sportqa erekshe mán berý - zııalylyqtyń alǵy sharty. Nurlan Báttashuly elge Zere ájemizdi jetkizip, Qunanbaıdaı aǵa sultan, qajyny naǵashylarymen qaýyshtyrdy. Halyq jazýshysy, el aýzynda «Mahabattyń jyrshysy» atanǵan Ázilhan Nurshaıyqov, aıtystyń Qulageri atanǵan Qalıhan Altynbaevqa arnalyp eskertkish ornatylyp, halqymen qaýyshty. Ǵalym, ánshi, aqıyq aqyn Tursynhan Ábdirahmanova apamyzdyń ómirden ótkenine 15 jyl bolypty», - dedi Tóleýberdi Áýbákir.
Saltanatty sharada abaılyq aqyn Tólegen Janǵalıev erteden tósekte basy, tóskeıde maly qatar tabylǵan qart Shyńǵystaý men Qalbataýdyń qashanda qýanyshy ortaq ekendigin tilge tıek etip, óshkenin jańǵyrtqan óńir halqyna degen arnaýy tartý etti.
Tursynhan Ábdirahmanqyzynyń týystary atynan sóz alǵan bilim berý salasynyń ardageri Mádenıet Májenova jerlesterine degen qurmetin jetkizdi.
Óleńdi serik etken jas órenderde aqyn apalaryna arnaǵan arnaýlaryn arnap, Tursynhan Ábdirahmanqyzynyń shyǵarmalaryn oqydy.
Mereıli merekeniń arqaýy bolǵan izgilikti shara Mádenıet úıinde jalǵasyp, munda «Órkendi ólke, mereıli meken» atty Jarma aýdanynyń 90 jyldyǵyna jáne aqyn, ǵalym, Qazaqstannyń halyq jazýshysy Tursynhan Ábdirahmanovanyń ádebı murasynda arnalǵan respýblıkalyq ǵylymı-praktıkalyq konferentsııamen jalǵasty. Munda zııaly qaýym ókilderi keleli, ǵylymı oı qozǵady.
Mádenı shara ulttyq oıyndarǵa ulasyp, merekelik kontsertpen óz jalǵasyn tapty.
