ShQO-da akýsher tastandy balany qutqarý úshin ózi emizgen
ÓSKEMEN. QazAqparat - Óskemen qalasynyń irgesindegi Praporşıkov aýylynyń akýsheri úsik shalǵan náresteni qutqarý úshin aq sútin aýzyna tamyzǵan, dep habarlaıdy QazAqparat tilshisi.
Oqıǵa aqpan aıynda bolǵanymen, onyń mán-jaıy endi belgili bolyp jatyr. Praporşıkov aýylynyń turǵyny óz balasyn «tastandy sharana» retinde Óskemendegi ana men bala ortalyǵyna ótkizbekshi bolǵan. Glýbokoe aýdanynyń jedel járdem qyzmetine «103» nómiri arqyly habarlasqan kelinshek kósheden jańa týǵan náresteni taýyp alǵanyn habarlaǵan. Ýchaskelik polıtseı tekserý barysynda balanyń anasy qońyraý shalǵan adamnyń ózi ekenin anyqtaǵan.
Dárigerler balany aman alyp qalý úshin biraz áýrege túsken eken. Óıtkeni, 6 aılyǵynda shala týǵan balanyń salmaǵy 1,5 keli ǵana bolypty. Onyń ústine anasy dalada bosanǵandyqtan, qatty tońyp qalsa kerek.
«Ádette mundaı nárestelerdiń júrek soǵysy mınýtyna 140-150 bolady. Al bul balanyń júrek soǵysy 55-ten aspady. Ómiri qyl ústinde turǵandyqtan, omyraý sútin emizý kerek edi. Qasymdaǵy akýsher Jaýqazyn Saǵıdoldınova óz sútin aýzyna tamyzdy. Osydan keıin ǵana balanyń beti beri qarady. Biz onyń anasyn kórgen joqpyz. Ol kezde áıeldi polıtsııa qyzmetkerleri tergeýge áketken. Úı óte sýyq boldy. Úsheýlep júrip balany peshtiń ústine ustap, jaıalyǵyn úzdiksiz otqa jylytyp otyrdyq. Odan keıin jedel járdem kelip, Óskemendegi ana men bala ortalyǵyna áketti» - deıdi aýyldyq ambýlatorııanyń bas dárigeri Lena Mýsına.
Aýyl dárigerimen birge jetken ýchaskelik polıtsııa qyzmetkeri Rýslan Orazametov balanyń múshkil halin kórip, óz áıelin aldyrǵan. Alaıda álsirep qalǵan bala ózdiginen eme almaǵan eken.
Qazir náresteniń densaýlyǵy ońala bastaǵan. Bul qylyǵyn náresteniń anasy kúıeýiniń turaqty jumysta joq bolýymen, otbasynyń áleýmettik jaǵdaıy tómendigimen túsindirgen. Basynda bul oqıǵaǵa baılanysty is qozǵalyp, keıin toqtatylǵan. Ananyń balasyn dalaǵa tastamaı, dáriger shaqyrǵany eskerilipti. Náreste shıraǵan soń týǵan úıine oralatyn boldy.
Aıta keteıik, osy aýyldyń ýchaskelik polıtseıi Rýslan Orazametov qys ortasynda aýlasyna sý jaıylǵan zeınetker men nemeresin qarǵyn sýdyń qursaýynan qutqaryp qalǵan bolatyn.
