ShQO-da aqsha bopsalaýmen aınalysqan qylmystyq toptyń 8 múshesi ustaldy

ÓSKEMEN. QazAqparat – Shyǵys Qazaqstan oblysynda aqsha bopsalaýmen aınalysqan qylmystyq toptyń 8 múshesi ustaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, tártip saqshylary men Ulttyq ulan sarbazdary birlesip, óńir aýmaǵynda birqatar qylmys jasaǵan qylmystyq toptyń jolyn kesti.

Olar Katonqaraǵaı aýdanynda kásipkerdi asa iri mólsherde bopsalaǵan. Atalǵan derek boıynsha 8 adam quryqtalyp, qazirgi ýaqytta onyń 4-ýi qamaýǵa alynǵan.

«Qazirgi ýaqytta QR QK-niń 287-baby 3-bóligi (Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý) jáne QR QK-niń 194-baby 2-bóligi (Qorqytyp alý) boıynsha sotqa deıingi tergeý júrgizilýde», - delingen aqparatta.

Eske salsaq, osyǵan deıin Ulttyq qaýipsizdik komıteti Óskemende qylmystyq toptardyń qarýly teke-tiresiniń aldyn alǵany habarlanǵan.