ShQO-da aqsha bopsalaǵan 3 polıtseı sottaldy

ÓSKEMEN. KAZINFORM – Shyǵys Qazaqstan oblysy turǵynynyń abyroıyn túsiretin vıdeony taratamyz dep qorqytqan polıtseılerge qatysty sot úkimi shyqty.

Sot isi Óskemen qalalyq №2 sotynda qaraldy. Anyqtalǵandaı, polıtsııa qyzmetkerleri jábirlenýshiniń jeke ómirine qatysty derekterdi bilip, odan aqsha bopsalaý úshin aldyn ala sóz baılasqan.

Sodan soń er adamǵa abyroıyna nuqsan keltiretin vıdeony kórsetken. Ol bolsa tártip saqshylarynyń talabyna kónip, 3 mln teńge bergen. Sot barysynda úsheýi de óz kinálaryn moıyndaǵan joq.

- Aıyptalýshylar QK-niń 362-baby 4-bóligi 3-tarmaǵy (ózine nemese basqa adamdarǵa paıda men artyqshylyqtar alý maqsatynda laýazymdyq ókilettigin asyra paıdalaný) jáne 194-baby 2-bóligi 2-tarmaǵy (aldyn ala sóz baılasý arqyly toppen bopsalaý) boıynsha kináli dep tanyldy. Sot sheshimimen olardyń biri 6 jylǵa, ekeýi 5 jyl 6 aı merzimge bas bostandyǵynan aıyryldy, - dep habarlady ShQO sotynyń baspasóz qyzmetinen.

Úsheýine de memlekettik qyzmette jumys isteýge ómir boıyna tyıym salyndy. Úkim áli zańdy kúshine engen joq.

Eske salsaq, osyǵan deıin Abaı oblysynda qarjy pıramıdasyn uıymdastyrǵan eki azamat sottalǵany habarlanǵan.