ShQO-da ákim saılaýy ótetin aýdandarda qansha kandıdat tirkelgen
Qarashanyń 5-i kúni Shyǵys Qazaqstan oblysyndaǵy Glýbokoe jáne Altaı aýdandarynda ákim saılaýy ótedi, dep habarlaıdy Kazinform.
Shyǵys Qazaqstanda oblystyq máslıhat depýtattary ákim saılaýy ótetin aýdandar retinde Glýbokoe jáne Altaı aýdandaryn belgilegen bolatyn. Qazir saılaý ýchaskeleri jumysqa daıyn.
«Glýbokoe aýdanynda ákim bolýǵa kandıdat retinde 3 adam, Altaı aýdanynda 2 adam tirkelgen. Ýchaskelik jáne aýmaqtyq komıssııalardyń quramy bekitilip, jarııalandy. Halyqty keńinen aqparattandyrý úshin saılaý komıssııalarynyń músheleri daýys berý ýaqyty men ornyn kórsetilgen shaqyrý qaǵazdaryn taratty, teledıdar men radıodan beınerolıkter men aýdıorolıkter jarııalandy, áleýmettik jelilerge saılaýdyń ótetini týraly málimetter ornalastyryldy. Árbir saılaý ýchaskesinde kandıdattar týraly aqparattyq plakattar jabystyrylǵan», - dep habarlady ShQO ákimdiginen.
Halyqty saılaý ýchaskeleri týraly aqparattandyrý úshin aýdandardaǵy ákimdikter janynda eki sall-ortalyq jumys istep tur.
Sonymen qatar ýchaskege tirkelýdiń durystyǵyn «Elektrondy qyzmetter ortalyǵy» portalynyń «Óz saılaý ýchaskeńdi tap» servısi jáne «Digital East» mobıldi qosymshasy arqyly tekserýge bolady.
«Aldaǵy saılaý týraly turǵyndar SMS arqyly da qulaqtandyrylýda. 1 myńnan astam saılaýshy turatyn 27 ýchaskede azamattardyń tirkelý orny boıynsha málimetterin tekserý úshin onlaın servıster ornatylady», - delingen aqparatta.
