ShQO-da aq kıimdi qyzmetkerler qarǵa tyǵylyp, túrme aýmaǵyna zat laqtyrǵandardy ustady
ÓSKEMEN. QazAqparat – Shyǵys Qazaqstan oblysynda túrme aýmaǵyna tyıym salynǵan zattardy laqtyrǵan er adam ustaldy, dep habarlaıdy QazAqparat tilshisi.
ShQO boıynsha QAJ departamenti baspasóz qyzmetiniń málimetine súıensek, OV-156/20 túzetý mekemesiniń qyzmetkerleri aq tústi kıim kıip, qarǵa tyǵylyp jatqan. Bundaǵy maqsat – túrme aýmaǵyna kirgizýge tyıym salynǵan zattardy laqtyratyndardy qolǵa túsirý. Osynyń nátıjesinde kolonııa qorshaýyna kelip, jan-jaǵynan eshkimdi baıqamaǵan soń úsh túıinshekti laqtyrmaq bolǵan 46 jastaǵy er adam ustalǵan. Tekserý kezinde onyń qaltasynan uıaly telefon jáne 50 aq tústi tabletka salynǵan túıinshekter tabyldy.
«Ol qalyń qardyń arasyna jasyrynǵan qyzmetkerlerdi baıqamaı qalǵan. Saqshylar ony qımyl-qozǵalyssyz baqylap otyrdy. Er adam qaltasynan úsh túıinshekti alyp shyqqan sátte mekeme qyzmetkerleri ony lezde qolǵa túsirdi. Tártip buzýshyǵa qatysty hattama toltyrylǵan. Atalǵan fakti boıynsha protsessýaldyq sheshim qabyldaý úshin materıaldar quzyretti organga joldandy», - deıdi ShQO boıynsha QAJD bastyǵy Janbolat Káletaev.
Aıta keteıik, OV-156/20 qyzmetkerleri eki aıdyń ishinde 20-ǵa jýyq telefon, ishimdik pen jarty keli esirtkini tárkilegen.
