ShQO-da adam súıegi tabyldy, biraq qol-aıaǵy baılanǵan qyz týraly aqparat jalǵan bolyp shyqty
ÓSKEMEN. KAZINFORM — Shyǵys Qazaqstan oblysyndaǵy Bystrýha aýylynyń mańynan adam súıegi tabylǵany týraly aqparat áleýmettik jelide tarap ketti. Jeli qoldanýshylary ózennen qol-aıaǵy baılanǵan jas áıeldiń máıiti tabylǵanyn jazǵan. Alaıda oblystyq polıtsııa departamenti bul aqparatty joqqa shyǵardy.
Vedomstvo málimetinshe, eldi meken mańynan adam súıeginiń tabylǵany ras. Osy derek boıynsha sotqa deıingi tergeý bastalǵan. Alaıda oqıǵa ornyndaǵy naqty jaǵdaı áleýmettik jelilerde taraǵan aqparattan múlde ózgeshe.
— Sarapshylardyń aldyn ala qorytyndysyna sáıkes, tabylǵan qańqa súıekteri qyz balaǵa emes, er adamǵa tıesili. Qazirgi ýaqytta krımınalıster men tergeýshiler marqumnyń kim ekenin jáne óliminiń naqty sebebin anyqtaý úshin qajetti saraptamalardy júrgizip jatyr. Onyń qoly men aıaǵy baılanǵany týraly aqparat shyndyqqa janaspaıdy, — dep habarlady ShQO Polıtsııa departamentiniń baspasóz qyzmetinen.
Tergeýdiń ózge de mán-jaılary QR Qylmystyq-protsestik kodeksiniń 201-babyna sáıkes ázirge jarııa etilmeıdi.
Polıtseıler turǵyndardy tek resmı aqparatqa senýge jáne halyq arasynda negizsiz alań týǵyzýy múmkin tekserilmegen málimetterdi taratpaýǵa úndedi.
Eske salaıyq, osyǵan deıin Petropavlda súıekterdiń shyǵyp jatqanyna qaramastan, eski zırattyń ústinde qurylys júrip jatqanyn jazǵan edik.