ShQO-da adam qaǵyp óltirip, qashyp ketken júrgizýshi izdestirilýde
ÓSKEMEN. QazAqparat – Shyǵys Qazaqstan oblysy Ulan aýdanynda jaıaý júrginshini qaǵyp óltirip, qashyp ketken júrgizýshi izdestirilýde, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, jol-kólik oqıǵasy 28 shilde kúni túngi saǵat 01:30 shamasynda Ulan aýdany Aıyrtaý aýylynyń mańynda bolǵan.
«Ázirge kim ekendigi belgisiz kólik júrgizýshisi jaıaý júrginshini qaǵyp sol jerden iz sýytqan. Sonyń saldarynan 35 jastaǵy er adam sol jerde kóz jumdy», - delingen aqparatta.
Atalǵan fakti boıynsha QR Qylmystyq Kodeksiniń 345-baby 3-bóligi (Kólik tizgindegen adamnyń jol júrisi nemese kólik quraldaryn paıdalaný erejelerin buzýy saldarynan adam ólimine ákep soǵýy) jáne 347-babyna (Jol-kólik oqıǵasy bolǵan jerden ketip qalý) sáıkes sotqa deıingi tergeý amaldary bastaldy.
Qazirgi ýaqytta júrgizýshiniń kim ekenin anyqtaý boıynsha qajetti jedel-izdestirý sharalary júrgizilýde. Birqatar sot-medıtsınalyq saraptama taǵaıyndaldy.
