ShQO-da «Abaı álemi» jobasy aıasynda 22 kitap jaryq kóredi
2018 jyldan bastap Semeı qalasyndaǵy Abaı kitaphanasynda «Rýhanı jańǵyrý» baǵdarlamasy aıasynda «Abaı álemi» kitaptar toptamasy jobasy qolǵa alynǵan. Mundaǵy maqsat – qazaq mádenıeti men ádebıetiniń damýyna yqpal etý, óńirden shyqqan aqyn-jazýshylardyń týyndylaryn qaıta basyp shyǵarý, jastar arasynda dáripteý.
Bes jylǵa arnalǵan joba 2018-2022 jyldary aralyǵynda júzege asyrylmaq. Joba boıynsha jyl saıyn jańa kitaptar shyǵarylyp, oqyrman qaýym jańa esimdermen tanysady. Kitaptardyń tizimi de ázirlenip qoıǵan.
Qalalyq Aqparat ortalyǵynyń málimetine súıensek, 2018 jyly 38 mıllıon teńgege 13 689 dana kitap shyǵaryldy. 2019 jyly 6500 dana kitap jaryq kórgen. Aqyn-jazýshylardyń shyǵarmalaryn baǵalaý jáne jarııalaý jónindegi keńeske Qazaqstan Jazýshylar odaǵynyń múshesi, «Qurmet» ordeniniń ıegeri Medeý Sárseke jetekshilik etýde. Jospar boıynsha osy jyldyń sońyna deıin «Abaı álemi» kitaptar toptamasy aıasynda 51 mln teńgege 23 000 dana tırajben 22 kitap shyǵarylady.
«Bıyl jaryqqa shyǵatyn kitaptardyń qatarynda Abaı shyǵarmashylyǵyn zertteýshilerdiń jınaqtary, uly aqyn izbasarlarynyń shyǵarmalary, Abaı týyndylarynyń aǵylshyn tilindegi jınaqtary jáne jeke avtorlardyń kitaptary bar. Karantın kezinde bizdiń kitaphana jańasha formatta jumys isteýde. Vırtýaldy kórmeler, lektsııalar jáne basqa da qyzyqty is-sharalar áleýmettik jeliler arqyly onlaın rejımde ótýde, - deıdi Abaı kitaphanasy dırektorynyń orynbasary Gúlmıra Nuǵymanova.
