ShQO-da «Abaı álemi» jobasy aıasynda 16 avtordyń shyǵarmalary jaryq kórdi
Vıtse-premer áýeli Semeı qalasynyń Qazaq ınnovatsııalyq gýmanıtarlyq-zań ýnıversıtetinde «Abaı álemi» keń kólemdi kitap kórmesiniń jumysymen tanysty. Oblys ákimi Danıal Ahmetov bul jobanyń «Rýhanı jańǵyrý» baǵdarlamasy aıasynda júzege asyp jatqanyn aıtty.
«Abaı álemi» kitaptar toptamasy - «Rýhanı jańǵyrý» ulttyq baǵdarlamasy aıasynda Qazaqstanannyń mádenıeti men ádebıetiniń damýyna yqpal etýge, Shyǵystan shyqqan uly tulǵalar men aqyn-jazýshylardyń týyndylaryn qaıta jańǵyrtyp shyǵarýǵa, kórkem ádebıet arqyly jastardy otansúıgishtikke tárbıeleýge baǵyttalǵan bes jyldyq ádebı joba. 2018 jyly joba aıasynda jergilikti avtorlardyń 16 kitaby jaryqqa shyǵyp, oblys kitaphanalaryna taratyldy», - dedi D.Ahmetov.
Ákimniń aıtýynsha, basylymnyń basty ereksheligi - kitapqa alǵysóz retinde abaıtanýdyń bastaýynda turǵan Kákitaı Ysqaquly, Ahmet Baıtursynuly, Muhtar Áýezov maqalalarynyń tuńǵysh ret birge jarııalanýynda.
Shákárimniń 160 jyldyǵy qarsańynda shyǵarmalary 2 tom bolyp baspa kórip, aqynnyń 1911-1912 jyldary Semeı, Orynbor qalalarynda tóte jazýmen jaryq kórgen kitaptary, XX ǵasyrdyń basynda merzimdi basylymdarda jaryq kórgen aýdarmalary berilgen. 
«Abaı joly» roman-epopeıasyn orys tiline aýdarǵan reseılik jazýshy, aýdarmashy Anatolıı Kımniń aýdarma nusqasy jaryqqa shyǵarylǵan.
«Bul shyǵarmalarǵa alǵysóz retinde jazýshynyń uly Murat Áýezov pen nemeresi Dııar Qonaevtyń maqalalary endi. Abaı, Muhtar, Shákárim shyǵarmalaryn joǵary baǵalaǵan, Qazaqstannyń tuńǵysh halyq aqyny - Tóleý Kóbdikov. Aqynnyń shyǵarmalary buryn baspa kórmegen týyndylarymen tolyqtyrylyp, birinshi ret tolyq túrde jarııalandy», - dedi aımaq basshysy.
Ádebı joba aıasynda tuńǵysh ret Fedor Dostoevskııdiń Semeıde turǵan jyldary jazǵan shyǵarmalary jarııalanypty. Eýropany tamsantqan Ámire Qashaýbaev jaıly estelikter jınaǵy «Ánshi Ámire» ataýymen qazaq jáne orys tilderinde bir kitapqa toptastyrylyp baspa kórdi. Kitapqa ánshi jaıly eń úzdik maqalalar men Jarqyn Shákárimniń 2016 jyly orys tilinde shyǵarǵan «Amre v Parıje» kitaby tolyqtaı enip otyr.
Shyǵys óńirinen shyqqan balalar jazýshysy, balalar kitaby boıynsha H.K. Andersen atyndaǵy Qurmet dıplomynyń ıegeri Marat Qabanbaevtyń balalarǵa arnalǵan «Chetyre vremenı rodnoı zemlı» atty prozalyq shyǵarmalary alǵash ret orys tilinde shyǵys óńirinde jaryq kórip, jasóspirimderge usynyldy.
«Abaı álemi» jobasy aıasynda jaryq kóretin avtorlardyń kitaptary aldaǵy jyly da basylyp shyǵa beredi. Bıylǵy jyl Jastar jyly bolyp jarııalanǵandyqtan, shyǵys óńiriniń jas talanttarynyń shyǵarmalary da jaryq kórmek.
