ShQO-da 93 myńnan astam oqýshy jazǵy demalyspen qamtylady
ÓSKEMEN. KAZINFORM – Shyǵys Qazaqstan oblysyndaǵy 1-10 synyptar aralyǵyndaǵy 93 482 oqýshyny jazǵy demalys jáne saýyqtyrýmen qamtý josparlanýda. Onyń ishinde 4850-i kópbalaly jáne az qamtylǵan otbasynyń balalary.
Bıyl óńir boıynsha 420 jazǵy lager jumys isteıdi. Qala shetindegi 15 lagerdiń 11-i memlekettik, 4-i jekemenshik. 270 lager mektep janynda bolsa, 135-i beıindik alańdar.
— Sonymen qatar mektep oqýshylarynyń Almatydaǵy «Bóbek» jáne «Baldáýren» ulttyq bilim berý jáne saýyqtyrý ortalyqtarynda jyl boıy tegin demalýǵa múmkindikteri bar. Jyl basynan beri osy ortalyqtarda 156 bala demalyp úlgerse, jeltoqsanǵa deıin taǵy 277 oqýshy joldama alady. Balalardyń bos ýaqytyn jáne demalysyn uıymdastyrýǵa oblystaǵy 819 tárbıeshi men tálimger, 670 qosymsha bilim berý pedagogy men 250 medıtsına qyzmetkeri, kolledjder men joǵary oqý oryndarynyń stýdentterinen quralǵan pedagogıkalyq ujymdar jumyldyrylady, — deıdi ShQO Bilim basqarmasynyń basshysy Innesa Chernysheva.
Jazǵy kanıkýl kezinde oblystyń qala shetindegi balalar lagerinde 8100 oqýshy demalsa, mektep janyndaǵy lagerlerge 18 672 oqýshy barady. Sondaı-aq 36 qosymsha bilim berý uıymynda 37 900 balaǵa kúndizgi lagerler, pikirsaıys alańdary, shyǵarmashylyq stýdııalar, sport sektsııalary uıymdastyrylmaq.
— Jas natýralıster stantsııalarynda dalalyq ekologııalyq mektepterde 750 jas zertteýshi qorshaǵan ortany, onyń ishinde, erekshe qorǵalatyn tabıǵı aýmaqtardaǵy monıtorıngke qatysady. 27 aýla jasóspirimder klýby, kovorkıng ortalyqtary jáne 3500 oqýshyǵa arnalǵan úıirmeler jumys isteıdi. 24 560 oqýshy memlekettik ulttyq tabıǵı parkter men kıeli jerlerge ekspedıtsııalar men týrıstik marshrýttarǵa sapar shegedi, — deıdi basqarma basshysy.
Balalar týrızmin damytý maqsatynda 200 jetim, ata-anasynyń qamqorlyǵynsyz qalǵan balalar men týrıstik jarystardyń jeńimpazdary úshin Buqtyrma sý qoımasyna teplohodpen qyzyqty bir kúndik ekskýrsııalar ótkiziledi. «Jazdyq joldama» respýblıkalyq jobasynyń aıasynda aýyldyń 5-8 synyp oqýshylary — oqý ozattary, olımpıadalardyń, baıqaýlardyń jeńimpazdary men júldegerlerinen 689 bala «Daryn» lagerinde «Qazaqstan halqyna» qoǵamdyq qorynyń qarajatyna demalmaq.
— Byltyr jazǵy demalys kezinde «Qonaqjaı otbasy» jobasy júzege asyrylǵan. Bıyl jobanyń geografııasy keńeıedi. Joba 50 otbasyn jáne 120 balany qamtıtyn 3 aýdannyń 6 eldi mekenin qamtıdy. Atap aıtqanda, Katonqaraǵaı, Glýbokoe aýdandary men Rıdder qalasy. Joba balalardy qazaq tilin ádetten tys, biraq óte tıimdi formatta oqytýdy — olardy tildik ortaǵa tolyǵymen sińirýdi kózdeıdi. Sonymen qatar balalarǵa ólkeniń tarıhyn, qazaq halqynyń salt-dástúrin, ádet-ǵurpyn tanyp bilýge, qazaqtyń halyq aspaptarynda oınap, kıeli jerler men tarıhı eskertkishterdi aralaýǵa múmkindik beretin baǵdarlama daıyndaldy, — deıdi Innesa Chernysheva.
Budan bólek, jazǵy demalys kezinde Samar aýdanynda jumys istep turǵan «Balaýsa» lageriniń bazasynda óskeleń urpaqqa patrıottyq tárbıe berý maqsatynda 7-8 synyp oqýshylary úshin áskerı-patrıottyq lager ashý josparlanýda. Lager baǵdarlamasyna dástúrli is-sharalarmen qatar áskerı-taktıkalyq oıyndar, áskerı qyzmetkerlermen kezdesýler, alǵashqy áskerı daıyndyq elementteri engizilgen.
Aıta keteıik, balalardyń jazǵy demalys ýaqytynda sapaly jáne qaýipsiz saýyqtyrý demalysyn, bos ýaqytyn jáne jumyspen qamtylýyn uıymdastyrý maqsatynda oblysta polıtsııa, tótenshe jaǵdaılar departamentteri, sanıtarlyq-epıdemıologııalyq baqylaý organdary ókilderin tarta otyryp, oblys ákiminiń orynbasary tóraǵalyq etetin vedomstvoaralyq jumys toby qurylǵan.
