ShQO-da 92 jastaǵy keıýanaǵa qaraqshylyq shabýyl jasaǵan kúdikti ustaldy
ÓSKEMEN. QazAqparat – Shyǵys Qazaqstan oblysy Rıdder qalasynda zeınetkerge qaraqshylyq shabýyl jasaǵan qaskóı ustaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, polıtsııaǵa habarlasqan 92 jastaǵy keıýana páterine tereze arqyly kirgen belgisiz bireýdiń ózine kúsh qoldanyp, aqsha talap etkenin aıtty.
«Belgili bolǵandaı, qart kisi úıde jalǵyz turady. Qulaǵy durys estimeıtindikten, qylmyskerdiń ishke kirgenin baıqamaı da qalǵan. Óziniń aram pıǵylyn júzege asyrmaq bolǵan er adam zeınetkerdi tunshyqtyryp, odan aqsha talap ete bastaıdy. Sol kezde keıýana esinen tanyp qalǵan. Amaly quryǵan qylmysker izin sýytqan», - dep habarlady vedomstvo ókilderi.
Habar túse salysymen oqıǵa ornyna polıtsııa qyzmetkerleri jetip, izdeý jumystaryna barlyq jeke quram jumyldyryldy.
«Osyndaı kezde ár mınýt qymbat. Óıtkeni shabýyldaýshy alysqa uzap, tipti qala aýmaǵynan shyǵyp ketýi múmkin edi. Alaıda tártip saqshylarynyń jedel is-áreketteri nátıjesinde ol qolǵa tústi. Qazirgi ýaqytta sot sanktsııasymen kúdikti qamaýǵa alynǵan. Oǵan qatysty QR QK-niń 192-baby 3-bóligine sáıkes sotqa deıingi tergeý amaldary júrgizilýde. Er adam 12 jylǵa deıin bas bostandyǵynan aıyrylýy múmkin», - dedi oblystyq Polıtsııa departamentiniń bastyǵy Saǵat Mádıev.
Óz kezeginde qart kisi men onyń kórshileri polıtseılerge qylmysty ashyp, qaskóıdi ustaǵandary úshin alǵys bildirdi.
