ShQO-da 91 myńnan astam bala vaktsınanyń eki komponentin saldyrdy

ÓSKEMEN. QazAqparat – Shyǵys Qazaqstan oblysynda 91 myńnan astam bala vaktsınanyń eki komponentin aldy, dep habarlaıdy QazAqparat tilshisi.

ShQO Densaýlyq saqtaý basqarmasy baspasóz qyzmetiniń málimetine súıensek, óńirde COVID-19 ınfektsııasyna qarsy amerıkalyq Pfizer vaktsınasyn saldyrý naýqany jalǵasýda.

«Aımaq boıynsha atalǵan ekpeniń ekinshi komponentin 101 958 adam saldyrdy. Onyń ishinde 12-18 jas aralyǵyndaǵy 91 526 bala bar. Olardy vaktsınalaý tek ata-anasynyń ruqsatymen júrgizilýde. Sondaı-aq 2413 júkti jáne 8019 bala emizetin áıel ekpe aldy», - delingen aqparatta.

Budan bólek, oblysta 50 jastan asqan qarttar men medıtsına qyzmetkerleri Pfizer ekpesimen revaktsınatsııadan ótýde. Qazir osy sanattaǵy 29 446 adam úshinshi ret vaktsına alyp otyr.

Sońǵy málimetterge sáıkes, jalpy Shyǵys Qazaqstanda 513 392 adam koronavırýsqa qarsy revaktsınatsııadan ótken.