ShQO-da 90-nan astam oqýshy «Meniń kishi Otanym» baıqaýyna qatysty

ÓSKEMEN. QazAqparat – Shyǵys Qazaqstan oblysynda «Rýhanı jańǵyrý» baǵdarlamasy aıasynda jas tarıhshylardyń «Meniń kishi Otanym» zııatkerlik konkýrsy ótkizilýde, dep habarlaıdy QazAqparat tilshisi.

Baıqaýǵa óńir mektepterindegi 9-10 synyptyń 92 oqýshysy qatysty. Mundaǵy basty maqsat - óz eliniń tarıhyna qyzyǵýshylyq tanytatyn daryndy oqýshylardy anyqtaý, óskeleń urpaqty patrıottyqqa tárbıeleý, sondaı-aq oqýshylardyń ólketaný jáne Qazaqstan tarıhy boıynsha bilimin arttyrý.

«Daryn» qosymsha bilim berý jáne daryndylyqty damytý ǵylymı-ádistemelik ortalyǵy dırektorynyń orynbasary Gúljan Elemesovanyń aıtýynsha, baıqaý eki kezeńnen turady. Birinshi kezeń - Qazaqstan tarıhy boıynsha qashyqtan testileý. Ekinshi kezeń 4 nomınatsııa boıynsha ótkiziledi.

«Baıqaý aıasynda balalar «Meniń kishi otanymnyń tarıhy« taqyrybyna vıdeoreportaj jáne «Kishi otanymnyń sımvoly» taqyrybyna vıdeo túsiredi. Onlaın formatta «Meniń kishi Otanymnyń bolashaǵy» atty shyǵarmashylyq jumystar qorǵalady. Sonymen qatar «Meniń týǵan ólkem» taqyrybyna esse jazylady. Osynyń arqasynda oqýshylar óz ólkeleri týraly bilimderimen bólisip, óz Otanyna degen patrıottyǵyn kórsetip, bolashaqta týǵan jerleriniń qalaı damıtyny týraly pikirlerimen bólisedi», - dedi Gúljan Elemesova.

Qazylar alqasynyń múshesi, NurOtan ShQOF uıymdastyrý bóliminiń meńgerýshisi Nellı Krasnobaeva árbir usynylǵan jumystyń ereksheligin atap ótti.

«Balalar óz jobalaryn usyndy. Olar ózderiniń eldi mekenderiniń ál-aýqatyn qalaı jaqsartýǵa bolatyndyǵyn kórsetýge tyrysyp, maketterge kóp kóńil bóldi. Bul jastaǵy balalar ózderiniń týǵan ólkesiniń taǵdyryna beı-jaı qaramaıtyny óte mańyzdy. Sondyqtan bolashaqta olar óz eliniń ıgiligi úshin eńbektenedi. Keleshekte árbir joba júzege asyrylady dep úmittenemin», - dedi Nellı Krasnobaeva.

Eki kezeńniń qorytyndysy boıynsha 4 jeńimpaz iriktelip, qarasha aıynda ótetin respýblıkalyq kezeńge joldama alady.