ShQO-da 90-nan astam eldi mekendi sý basýy múmkin
Bul jaıly aımaq basshysy Danıal Ahmetov Instagram jelisindegi jeke paraqshasynda jazdy.
«Sý tasqynynyń aldyn alýǵa jáne kúresýge baǵyttalǵan óńirdiń daıyndyq sharalary belgilengen jospardy talqyladyq. 10 aqpannan sý basý qaýpi bar ýchaskelerdi tekserý jáne oblys aýmaǵyndaǵy gıdrologııalyq jaǵdaıǵa aerovızýaldy monıtorıng júrgizý jumystary bastalady. Búgingi tańda sý tasqyny qaýpi bar 94 eldi meken nemese 7191 turǵyn úı ornalasqan 121 ýchaske anyqtaldy. Mamandardyń aıtýynsha, sý basý qaýpi Óskemen qalasy, Altaı, Katonqaraǵaı, Tarbaǵataı, Glýbokoe jáne Borodýlıha aýdandarynda orta deńgeıden joǵary», - dedi ol.
Danıal Ahmetovtiń aıtýynsha, Úlbi, Taýly Úlbi, sondaı-aq Ertis ózeniniń Óskemen SES-nan Shúlbi sý qoımasyna deıingi tusynda júrgizilgen aerovızýaldy zertteý jaǵdaıdyń turaqty ekenin kórsetedi. Alaıda muzdyń qatýy baıqalady. Oblys ózenderiniń basym bóligindegi muzdyń qalyńdyǵy 2018-2020 jyldardyń kórsetkishterinen joǵary. Buqtyrma ózeninde 60-tan 70 sm-ge deıingi aralyqta.
«Qaýipti tómendetý maqsatynda Buqtyrma, Ertis, Kúrshim, Ýba ózenderinde profılaktıkalyq jarylys jumystaryn júrgizý úshin 18 ýchaske anyqtaldy. Osyǵan baılanysty sý tasqynyna qarsy is-sharalardy ótkizýge oblystyq bıýdjetten birinshi kezekte jarylys jáne jaǵalaýdy nyǵaıtý jumystary úshin qajetti qarajat bólinetinin atap ótkim keledi. Sonymen qatar barlyq sý qoımalaryndaǵy sýdyń deńgeıin baqylaýdy toqtatpaý qajet, onyń ishinde «Qazsýsharýashylyǵyna» qarasty aýmaqtar da bar», - dedi oblys ákimi.
Sondaı-aq birqatar aýdandarda jerdiń qatýy bir jarym metrge jetken. Jalpy jer qatýynyń ortasha deńgeıi óńirde 32-den 97 sm-ge deıin bolsa, qardyń bıiktigi 5-ten 40 sm-di quraıdy. Bul jerdiń áli de qatatynyn ańǵartady.
«Ótken jyldarda bolǵan sý tasqynyn eskere otyryp, ákimderge komıssııa qurý jáne aldyn alý is-sharalaryn búginnen bastaý tapsyryldy. Evakýatsııalyq pýnktterdi daıyndap, olardy belgilengen talaptarǵa sáıkes jabdyqtaý qajet. Barlyq tapsyrmalardyń oryndalýyn jumys toby ár aýdan jáne eldi meken boıynsha jeke-jeke tekseredi», - dedi aımaq basshysy.