ShQO-da 90 myńǵa jýyq bala vaktsınanyń eki komponentin aldy

ÓSKEMEN. QazAqparat – Shyǵys Qazaqstan oblysynda 90 myńǵa jýyq bala vaktsınanyń eki komponentin aldy, dep habarlaıdy QazAqparat tilshisi.

ShQO Densaýlyq saqtaý basqarmasy baspasóz qyzmetiniń málimetine súıensek, óńirde COVID-19 ınfektsııasyna qarsy amerıkalyq Pfizer vaktsınasyn saldyrý naýqany jalǵasýda.

«Aımaq boıynsha atalǵan ekpeniń ekinshi komponentin 99 186 adam saldyrdy. Onyń ishinde 12-18 jas aralyǵyndaǵy 89 314 bala bar. Olardy vaktsınalaý tek ata-anasynyń ruqsatymen júrgizilýde. Sondaı-aq 2214 júkti jáne 7658 bala emizetin áıel ekpe aldy», - delingen aqparatta.

Budan bólek, oblysta 50 jastan asqan qarttar men medıtsına qyzmetkerleri Pfizer ekpesimen revaktsınatsııadan ótýde. Qazir osy sanattaǵy 26 114 adam úshinshi ret vaktsına alyp otyr. Sońǵy málimetterge sáıkes, jalpy Shyǵys Qazaqstanda 491 383 adam koronavırýsqa qarsy revaktsınatsııadan ótken.