ShQO-da 9 tonnalyq tıtan quımasyn urlaý isi boıynsha sońǵy kúdikti 10 jyldan keıin ustaldy
ÓSKEMEN. KAZINFORM — Shyǵys Qazaqstan oblysynda 9 tonnadan asatyn tıtan quımasyn urlaý isi on jylǵa jýyq ýaqyt salyp tolyq aıaqtaldy. Polıtseıler urlyqqa qatysy bar sońǵy kúdiktini ustady.
ShQO polıtsııa departamentiniń málimetine súıensek, halyqaralyq izdeýde júrgen 63 jastaǵy er adamdy Almaty qalasynda krımınaldyq polıtsııa qyzmetkerleri qolǵa túsirdi.
Qylmys 2015 jyly jasalǵan. Tergeý derekterine sáıkes, sol kezde Óskemendegi kásiporynnyń bir top qyzmetkeri salmaǵy 9 370 keli, quny 31 mln teńgeden asatyn tıtan quımasyn urlaǵan.
Kúdiktiler júkti zaýyt aýmaǵynan kedergisiz alyp shyǵý úshin qyzmettik múmkindikterin paıdalanyp, tıtan quımasyn avtokóliktiń júk bóliginde tehnologııalyq jáne turmystyq qaldyqtardyń astyna jasyryp tasymaldamaq bolǵan.
Tergeý barysynda urlanǵan metall tabylyp, zańdy ıesine qaıtaryldy. Sondaı-aq qylmysqa qatysy bar adamdardyń basym bóligi anyqtalyp, jaýapqa tartyldy. Alaıda kúdiktilerdiń biri uzaq ýaqyt boıy boı tasalap júrgen.
— Osy jyldar boıy ony izdestirý jumystary bir sátke de toqtaǵan joq. Kúdiktiniń bolýy múmkin jerleri, aralasatyn ortasy jáne kelip túsken jedel aqparattardyń barlyǵy tekserilip otyrdy. Nátıjesinde er adam Almaty qalasynda ustaldy. Qazirgi ýaqytta ol ýaqytsha ustaý ızolıatoryna qamaldy, — dep habarlady departamenttiń baspasóz qyzmetinen.
Eske salsaq, osyǵan deıin Qaraǵandyda qaraqshylyq shabýyl men urlyq jasaǵan er adam ustalǵany habarlanǵan.
