ShQO-da 84 myńnan astam bala vaktsınanyń eki komponentin saldyrdy
ÓSKEMEN. QazAqparat – Shyǵys Qazaqstan oblysynda 84 myńnan astam bala koronavırýsqa qarsy Pfizer vaktsınasynyń eki komponentin saldyrdy, dep habarlaıdy QazAqparat tilshisi.
ShQO densaýlyq saqtaý basqarmasy baspasóz qyzmetiniń málimetine súıensek, ótken jyldyń qarasha aıynan bastap 12-18 jas aralyǵyndaǵy balalar, júkti jáne bala emizetin áıelder Pfizer vaktsınasymen egilýde.
«Aımaq boıynsha atalǵan ekpeniń birinshi komponentin 105 804 adam saldyrdy. Onyń ishinde 12-18 jas aralyǵyndaǵy 93 470 bala bar. Olardy vaktsınalaý tek ata-anasynyń ruqsatymen júrgizilýde. Sondaı-aq 3572 júkti jáne 8762 bala emizetin áıel ekpe aldy. Al 84 788 bala vaktsınanyń eki komponentin de saldyrǵan, - delingen aqparatta.
Budan bólek, oblysta 60 jastan asqan qarttar men medıtsına qyzmetkerleri Pfizer ekpesimen revaktsınatsııadan ótýde.
Qazir osy sanattaǵy 15 myńnan astam adam úshinshi ret vaktsına alyp otyr.
