ShQO-da 82 jastaǵy zeınetkerdi tonap ketken er adam ustaldy
ÓSKEMEN. QazAqparat – Shyǵys Qazaqstan oblysy Rıdder qalasynda 82 jastaǵy zeınetkerdi tonap ketken er adam ustaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, qazan aıynyń sońynda Rıdder qalasynyń polıtsııa bólimine habarlasqan zeınetker belgisiz bireýdiń ózine kúsh qoldanyp, aqshasyn tartyp alǵanyn aıtty. Oqıǵa ornyna birden jedel-tergeý toby attanǵan. Jedel áreket etken tártip saqshylary kúdikti retinde 33 jastaǵy jergilikti turǵyndy ustady.
«Tergeý barysynda anyqtalǵandaı, er adam bank bólimsheleriniń birinde aqsha sheship alǵan zeınetkerdi baıqap qalǵan. Sol kezde jymysqy oı kelgen ol qart kisiniń sońyna túsip, úıine deıin ańdyp barady. Jábirlenýshiniń ózine esh qarsylyq kórsete almaıtynyn bilgen rıdderlik úıdiń aýlasyna kiredi. Zeınetkerge kúsh qoldanyp, 65 myń teńgesin tartyp alady da oqıǵa ornynan boı tasalaıdy», - dedi ShQO PD bastyǵy Saǵat Mádıev.
Qazirgi ýaqytta QR Qylmystyq kodeksiniń 191-baby 3-bóligi boıynsha sotqa deıingi tergeý amaldary júrgizilýde. Kúdikti ýaqytsha ustaý ızolıatoryna qamaýǵa alynǵan.
