ShQO-da 82 saýda jáne oıyn-saýyq kesheni esepke alyndy
ÓSKEMEN. QazAqparat - Shyǵys Qazaqstan oblystyq tótenshe jaǵdaılar departamentiniń mamandary keıbir saýda oryndaryna órt qaýipsizdigin saqtaǵannan aıyppul ótep qutylý tıimdi bolyp turǵanyn aıtady, dep habarlaıdy QazAqparat tilshisi.
Reseıdegi qaıǵyly jaǵdaıdan keıin Shyǵys Qazaqstandaǵy saýda jáne oıyn-saýyq oryndary órt qaýipsizdigine tekserile bastady. Tekserýge jatatyn keshenderdiń jalpy aýdany 1500 sharshy metrdi quraıdy. Al jyl saıynǵy josparly tekserýde kemshilik tabylmaǵan nysandar bul tizimge kirmegen.
«Qazirgi tańda oblys boıynsha 82 saýda nysany esepke alynyp, joǵary dárejedegi táýekel nysandaryna jatqyzyldy. Órt qyzmetiniń mamandary olardyń sany budan da kóp bolýy múmkin ekenin aıtady. Óıtkeni kásipkerler bir nysannyń ózin qaǵaz júzinde bólshektep, birneshe adamnyń atyna jazǵyzyp tastaǵan. Osynyń kesirinen saýda nysany bolyp tirkelgen ǵımarattyń aýdany qujatta kishireıtilip kórsetiledi. Nysannyń qalǵan bóligi basqanyń menshiginde bolǵandyqtan, ony órt qaýipsizdigine jaýapty oryndar teksere almaıdy», - deıdi tótenshe jaǵdaı departamentiniń baspasóz hatshysy Anastasııa Sklıar.
Al keıbir kásipkerler úshin órt qaýipsizdiginiń talaptaryn saqtaǵannan aıyppul tólep qutylý tıimdi. Máselen, byltyr Semeı qalasyndaǵy «Arǵymaq» saýda úıinde órt qaýipsizdigine qaıshy kóptegen jaǵdaılar anyqtalǵan. Saýda ortalyǵynyń menshik ıesi bolyp sanalatyn «Taksomotornyı park» JShS kemshilikterdi kórsetilgen merzimde joımaǵan. Sóıtip is sotqa deıin jetedi. Sot saýda seriktestikke aıyppul salýmen shektelgen.
«Sot oryndary mundaı nysandardyń jumysyn toqtatýǵa quqyly. Biraq kóp jaǵdaıda olar aıyppul taǵaıyndaýmen shekteledi. Keıde ǵana nysannyń jumysyn 3-15 kúnge shekteıdi» - deıdi Anastasııa Sklıar.
2017 jyldan beri oblys aýmaǵynda 50-den astam saýda jáne oıyn-saýyq nysany órt qaýipsizdigine tekserýden ótip, 280 zańbuzýshylyq anyqtalǵan eken. Olqylyq jibergen nysan ıelerine jalpy jıyny 680,7 myń teńge aıyppul salynǵan.
